Aaja Chemnitz erseqqissaavoq: Ilaasortaatitaqalernerput akeqarpoq
Atlantikup Avannaanit ilaasortanngortut Mette Frederiksen Folketingimi partiit saamerliit amerlanerussuteqartitsinissaannik - kissaateqassappat amerlanerussuteqarnissaat qulakkeersinnaavaat. IA-li sinnerlugu ilaasortanngortup Aaja Chemnitzip Kalaallit Nunaanni Danmarkimilu qinersinerit inerneri pissarsiarineqarmata Sermitsiaq.AG-mjjt oqaatigaa, tamanna akikittuinnaassanngitsoq.
Aaja Chemnitz qinigaaffimmi aggersumi Folketingimi suli ilaasortaassaaq. Tamanna unnuaq qinersinerup inernerri pissarsiarineqarmata paasinarsivoq.
Folketingimut qinersisoqarmat 4.289-init taaguunneqarsimavoq, 2019-imi qinersisoqarmat 5.669-init taaguunneqarsimalluni.
- Qinigaaqqilluni nuannerlunilu oqiliallannarpoq. Suliassarpassuaqarpoq misilittakkakka aqqutigalugit Kalaallit Nunaannut sapinngisamik pitsaanerpaamik iluaqutaasussamik aaqqiissuteqarnissamut peqataaffigisinnaasannik.
Mette Frederiksen suniarnersoq takoqqaarniaraa
Danmarkimi naalakkersuisussanik pilersitsisoqartussanngorpoq, Aaja Chemnitzilu Mette Frederikseni partiinik saamerlernik amerlanerussuteqartitserusuppat amerlanerussuteqartitsisinnaalluni.
- Oqaatigineqareersutut Kalaallit Nunaata kiffaanngissuseqartumik oqaaseqartartorivaatigut partiinullu saamerlernut pissusissamisoortumik ilaalluta. Saqqummiussatsinnit qanoq pissarsiaqarsinnaanerluta maanna isumaqatiginninniassaagut.
Aaja Chemnitzip sapaatip-akunnerani matumani siusinnerusukkut Sermitsiaq.AG-mut oqaatiginikuuaa, Mette Frederiksen ministeriunissatut toqqarniarlugu, neriuutiginerarpaalu partiit saamerliit talerperliillu akornanni siammasissumik naalakkersuisoqartitsisoqalissasoq. Partiimilli saamerlermeersumik ministeriuninngortoqarnissaanik toqqaaniaraluarluni, IA-p amerlanerussuteqartitsinera arlalinnik piumasaqaatitaqartoq oqaatigaa. Aaja Chemnitzip aamma Mette Frederiksenip piffissami aggersumi qanoq piniarnerata tusarfiginissaa qilanaarinerarpaa.
- Mette Frederiksenip siammasissumik naalakkersuisuutitaqarnissamut qanoq ingerlatsiniarnera maanna tusartariaqarparput.
Pingaarutilinnut sunniuteqartarnissaq angorusukkaa
Aaja Chemnitz qinersinissaq sioqqullugu piumasaqaatinik qulinik allattuisimavoq, naalakkersuisunngortitsiniarnerup isumaqatiginninniutigineqarnerani akueritikkusutaminik, oqaatigaali pingaarutilinni sunniuteqartarnissaq pingaaruteqarnerpaasoq.
- Kalaallit Nunaat pineqartillugu isumaqatiginninniarnerni Kalaallit Nunaat peqataasassaaq. Aamma isumaginninnermut, illersornissaq pillugu isumaqatigiissummut nunanullu allanut tunngasutigut politikkikkut siunnersuisoqatigiinnut tunngassuteqartut pineqartillugit.
Kalaallit Nunatsinnit folketingimi ilaasortaatitat marluk isumaqatigiittuaannanngitsut qineqqusaartoqarnerani paasinarsivoq. Unnuaq KNR-imi oqallitsitsisoqarmat marluulluti erseqqissaassutigaat, qinigaaffimmi tulliuttumi sunniuteqarnerpaasarnissaq qulakkeerniarlugu suleqatigiittarnitik suli pitsaanerulersissinnaallugit.
- Pisuni suliassanilu arlalippassuartigut suleqatigiittareerpugut, isumaqarpungali assersuutigalugu Savalimmiuni politikkereqativut atlantikup avannaamiut gruppeqassanersut pillugu oqaloqatigissagivut.
Aaja Chemnitzip ilaatigut oqaatigaa, atlantikup avannaamiut gruppiat aqqutigalugu Kalaallit Nunaanni Savalimmiunilu suliniutinut assigiinngitsunut amerlanerusunik aningaasaliissuteqartoqartarnissaanut periarfissat annertusarneqarsinnaasut, neriuutiginerarpaalu Københavnimi ilinniartut atlantikup avannaaneersut kollegiaqalernerannik tamanna aamma inerneqarumaartoq.
Taasisui ikilingaatsiarsimasut
Aaja Chemnitzip nassuerutigaa, qinersisoqarnerani tapersersuisarsimasorpassuarnik annaasaqarsimalluni, isumaqarnerarporlu tamanna qineqqusaartoqarnerani ilaatigut oqaatsinik sakkortuunik atuisoqartarsimaneranik tunngaveqartoq.
- Tamanna uannut akerliuniarneruvoq. Nalunngilluinnarpara danskisut oqaaseqarnerunera pissutigalugu aporfissaqarnera pissusissamisuuginnartoq. Kingullermik qinersisoqarmat aamma taamaappoq, tassa danskisut oqalunnerusarama qinersisartunut anngussaqarsinnaanera killeqarami.