Aalisarneq pillugu ataatsimiititaliarsuaq: Pisassiissutinik akitsorterineq atulissagunarpoq
Pisassiissutinik agguaassinermi akitsorterisarnissap qanoq ilanngunneqarsinnaanera, aalisarneq pillugu ataatsimiititaliarsuup misissussavaa
Aalisagartassat pisassiissutigineqartut agguaanneqarneranni siunissami akitsorterussineq atorneqartalersinnaavoq. Aalisarneq pillugu ataatsimiititaliarsuup suliassaani tamanna allassimavoq.
- Ataatsimiititaliarsuup pisassanik agguaassinermi akitsorterussinermik aqutseriaatsit pillugit periarfissanik siunnersuusiussaaq, ataatsimiititaliarsuup suliassaani allassimavoq.
Suliassaq itisilerneqarsimanngilaq, aalisagartassiissutillu sorliit pineqarnersut allassimanani. Akitsorterussinissamullu periarfissat pillugit piumasaqaatit suunersut aamma allaqqasoqanngilaq. Suliassat taakku ataatsimiititaliarsuup suliassarisimassavai.
Ersarilluinnarporli akitsorterussinissamut periarfissanik suliaqarneq, Naalakkersuisut naalakkersuisunut tapersersuisunik Demokraatinik februaarip qiteqqunnerani isumaqatiginninniarlutik naapereersullu suliassaq ilanngunneqarsimasoq.
Naalakkersuisut Ilulissani ataatsimiinnerminni suliassanut tunngatillugu siunnersuutaat Sermitsiaq.AG-p tigummivaa. Siunnersuummi tassani akitsorterussinissamut periarfissaq taaneqarsimanngilaq.