Aalisarnermik nutaamik misileraaneq annertooq
Polar Seafood Island peqatigalugu ammassaqassutsimik nalunaarsuivoq, norskillu umiarsuaat marluk aamma ammassaqassutsimik nalunaarsuinermut ilannguteqqammerput.
Imaq Kalaallit Nunaata, Islandip aamma Jan Mayenip akornanniittoq ammassaqarluarsinnaammat, nutaamik aalisarnermik ammaasoqarsinnaavoq.
Umiarsuit sisamat ammassannik ujaasinermut peqataapput, taanna Islandip immamik misissuinermut oqartussaannik aaqqissuussaavoq. Kalaallit aamma Islandimiut umiarsuaat ukiortaamili misissuillutik aallartipput.
Polar Seafoodip aalisariut Arni Fridrikson misissuitippaa. Islandimiut Asgrimur atorpaat, norskillu aalisariutaat tassaapput Åkerøy aamma Roaldsen, Norgemi angallatit aalisartut kattuffianni Fiskebåtimi tamanna atuarneqarsinnaavoq.
Sushi
Aalisagaq ammassassuartupajaaq mamaqarpoq, ammassaallu suaat sushini ”masago”-mik taallugit atorneqartarput. Taamaattoq annerpaartaat aalisakkanut qajuusiarineqartalutillu uulialiarineqartarput.
Ammassaat Islandip sineriaanut suffiartortartut oqaatigineqarpoq, kisianni oqartussat maannamut misissuinerit ammassattassiinissamut tunngavissatut naammaginngilaat.
Ammassaat 11-20 centimeterisut takissuseqartarput, issittup imartaani ataatsimoortarlutik, ilaatigullu saarullinnit aamma puisinit nerisarineqarput.
Neriuuteqartut
Ammassaqassutsip annertunerata uppernarsarneqarsinnaanissaa Polar Seafoodimit neriuutigineqarpoq, taamaalilluni tunisassiassanngorlugit aalisarneqarsinnaassammata.