Aalisarnermut aaqqissuusseqinnissaq akerleriissutaasoq

Nalaakkersuisoqatigiit Tjóðveldi (Republikanerit), Framsókn kiisalu lagmandspartii Javnaðarflokkurin (Socialdemokraatit) akerleriinnerat pissutaalluni Savalimmiuni qinersisoqaqqeriaannaavoq.

Oqaluttuaannanngortut...

Nalaakkersuisoqatigiit aaqqissuusseqinnissamut isumaqatigiissinnaanngippata, naalakkersuisoqatigiinneq unitsinneqariaannaasoq, Kringvarp Føroyarimi oqallittoqarnerani, Javnaðarflokkurin siulittaasuusimasoq lagmandimilu ilaasortaasimasoq, Jóannes Eidesgaard, oqarpoq.

- Isumaqatigiinnissaat pingaarutilerujuuvoq. Taamaanngippat annertuumik unammilligassaqalissaagut. Aaqqissuusseqinnissaq akerleriissutigineqaannassappat Naalakkersuisoqatigiit ingerlaannarsinnaanerannik aperineqaramik, lagmandi Aksel V. Johannesen oqarpoq.

Javnaðarflokkurinit piumasaqarput

Aalisarnermut naalakkersuisoq, Høgni Hoydal (Tj), marsip arfineq aappaanni aalisarnermut aaqqissuusseqinnissamut siunnersuutini lagmandimeersoq Aksel V. Johannesen (J) Framsóknillu siulittaasua Poul Michelsen peqatigalugit tusagassiuutinut katersortitsinikkut saqqummiuppaa.

Siunnersuulli naalakkersuisoqatigiinni tamakkiisumik taperserneqanngitsoq paasinarsivoq.

Marluk taperseerusunngitsut

Sapaatip akunnera uani marlunngornermi pingasunngornermilu naalakkersuisut Tvøroyrimi Suðuroyimiittumi siunnersuummut eqqartueqatigiipput. Tassani Javnaðarflokkurinimi ilaasortat Bjarni Hammeri Kristen Michelsenilu siunnersuummut isumaqataanngitsut paasineqarpoq.

Kingornalu Javnaðarflokkurinikkut qanoq annertutigisumik pilliuteqartigisinnaanertik partiinut allanut mailikkut nalunaarutigaat. Savalimmiuni nutaarsiassaqartitsivik in.fo allappoq.

Pisassiissutit killersorneqarnissaat partiit tamarmik nalornissutigaat

Javnaðarflokkurinit siunnersuummut kisimik isumaqataanngillat. Siunnersuummut taperseerusungani Hanna Jensen Framsøknimeersup nalunaarutigisimavaa. Tjóðveldimeersut aamma siunnersuummut nalornissuteqartut, Árni Gregersenip, in.fo-mi politikkikkut tusagassiortup ippassaq oqaatigaa.

Immikkoortut pingasut sakkortuumik isornartorsiorneqartut isumaqatigiinngissutigineqartut, Aksel V. Johannesenip, Kringvarp Føroyarimut paasissutissiaraa. Taassuma suut pineqarnersut oqaatiginngilaa.

Ullut aalisarfiusinnaasunit pisassiisalertoqarnissaa kiisalu antitrustimik maleruaqqusat allnngortinneqarniarnerat isumaqatigiinngissutaasoq, Høgni Hoydalip Kringvarp Føroyami oqaatigaa.

Ulapputtut

- Sivisuumik aalajangerniarneq tupinnartuliaanngilaq. Siunnersuummut inuit toqqissillutik isummernissaat pisariaqarpoq. Siunnersuulli suliarineqalerpat ataatsimoorfiusinnaanera qularutiginngilara, lagmandi, Kringvarp Føroyarimut oqarpoq.

Sapaatip akunnerata tulliani aaqqiisoqarsimassasoq, Lagmandip, Islandimi angalanermini, in.fo-mut paasissutissiaraa.

Lagtingip maajip 11-ni aasaanerani sulinngiffeqalertinnagit siunnersuutip siullermeerutaasumik suliarineqarnissaa pilersaarutaavoq.

Siunnersuut aappassaanik pingajussaanillu suliarineqaqqissappat piffissaliussami isuma aalajangiusimaneqartariaqassaaq, lagtingit juulip 29-ani katersuuteqqissapput.