Aalisarneq
Aalisarnermut inatsit isertuunneqartoq
Aalisarnermut, piniarnermut nunalerinermullu Naalakkersuisoq aalisarnermut inatsisissaq pillugu suli nipangersimavoq
– Inatsisartunut saqqummiutsinnagu oqaaseqarnianngilanga, aalisarnermut, piniarnermut nunalerinermullu Naalakkersuisoq Karl-Kristian Kruse (S) oqaaseqarumanngitsoq oqarpoq.
Nipangersimaneq kuultiunersoq ilisimaneqanngilaq. Qularutissaanngiarli tusagassiorfiit sumilluunniit paasitikkumaneqarneq ajormata, aalisarnermut inatsit eqqartorneqaleraangat, taannalu naalakkersuisup 2016-imi Upernaakkut Ataatsimiinnermi saqqummiuttussaavaa.
Suli nipangersimavoq
– Neriorsuisinnaanngilanga uanga naalakkersuisuuninni aalisarnermut inatsit naammassineqarumaartoq, taanna sivisuumik suliarineqarsimammat qinersinerpassuillu naalakkersuisullu arlallit aqqusaartarsimallugit, taanna januaarimi oqarpoq nangillunilu:
– Tamaviaarlutali ukioq manna naammassinissaa sulissutigaarput, maannakkullu pissutsit eqqarsaatigalugit naammassinissaa angumersussinnaavarput.
Taanna januaarimi oqaraluarpoq aalisarnermut inatsit ukioq manna naammassillugu suliarineqassasoq 2017-imilu januaarip aallaqqaataanit atuutilerluni. Ullumikkulli nipi allaalluinnarpoq.
Naalakkersuisup matu matusimavaa, atorfilittallu aamma oqaaseqarumanngillat politikkikkullu akisussaasumut innersuussiinnarlutik.
Oqaluttuaq tamaat Sermitsiami sapaatip akunnerani saqqummersumi atuaruk. Aviisi pisiarisinnaavat uani: