Qeqertarsuup Tunua
Aalisartut marluk umiatsiaat kivilersoq annaanneqartut
Angutit marluk 39-nik aamma 24-nik ukioqartut Saqqaliaraluartut annaanneqarput
24-nik ukioqartoq Kristian Broberg atiinilu 39-nik ukioqartoq Kristian Broberg umiatsiaat immannera pissutaalluni kiviartulersoq aalisariummit annaanneqarput pingasunngormat.
- Qujamasoqaagut kilisaatip Lumorip inuunerput annaassinnaasimammagu. Taakku qanittumiissimanngikkaluarpata aammalu angalaqatiga angallattakkamik VHF-radiomik nassarsimanngikkaluarpat ajunaarsimassgaluarpugut, angallaterpummi immaqaaq anorleruttortorlu motoorerput aallarumajunnaarluni, 39-nik ukioqartoq Kristian Broberg Royal Greenlandip nittartagaanut oqarpoq.
Motooriiartut
Royal Greenlandip aalisariutaanit Qullissat imartaani Lumorimit annaanneqarput.
Taakku angallammik 27 fodsiusumik Trophy-mik 200 HK sakkortussusilimmik motorilimmik angallateqarlutik Ilulissaniit piniariarlutik pingasunngormat aallarput. Ualikkut anorlileriartormat angutit taakku marluk Qullissat avataani kisartuinnarniarlutik aalajangersimapput.
- Kisariitsiarluta kisatta allunaasaa kittorarmat Saqqamut, ikerasak ikaarlugu ikaaginnarniarluta aalajangerpugut. Tassanngaannaq malerujussuit portungaatsiaqisut marluk akornanni millugunneqarpugut tassalu motorerput unilluni.
VHF-radiomik ajornartorsiuteqarneq
- Angallat sukkkasuumik immalertorpoq uangalu angallammik qalusininni aappara VHF-radio atorlugu Aasiaat Radioanut atassuteqarniarsarivoq. Kisiannili VHF-Radio angallammiittoq atorsinnaajunnaarpoq, qujanartumilli VHF radiomik angallattakkamik nassarallartilluni Aasiaat radioa atassuteqarfiginiarsaraa. Taamalineran kilisaat Lumorip Aasiaat radioanut nalunaaruteqarnerput tusaasimavaat, taakkulu Aasiaat radiuatigut sumiinnerput paasereeramikku ornilertorpaatigut.
- Taamaalinerani angallat immaannaavippoq uangalu qaloriinnaavippunga malissioqaagullu. Piffissami tasssani malerujussuaq angisooq takkussimasuuppat immap nukinginit millugussaasimassagaluarpugut, Kristian Broberg royalgreenland.gl-imut oqaluttuarpoq.
Kilisaatip Lumorip angutit marluk kivileramik ikioqqullutik Aasiaat radioanut nalunaaruteqarnerat nalunaaqutaq ualikkut sisamat qeqqanut tusaagamikku qalutik amuupallariarlugit annaassiniarlutik angutit sumiiffiata tungaannut ingerlaarput.