Aallaasersorumatooq iperagaariikatappoq
Angut 21-nik ukiulik arfininngornermi Paamiuni inissiarsuit akornanni aallaasersortoq sapaammi iperagaavoq
Paamiuni politiit decembarip pingajuanni nal. 05.34 kalerrinneqarput, angut 21-nik ukiulik aalakoortoq Avqusinertami inissiarsuit akornanni timmiarsiummik arlaleriarluni aallaariartartoq. Paamiuni politiit ulluinnarni aqutsisuat Christer Nielsen tusagassiivinnut nalunaarpoq.
Politiit misissuinerisa paasinarsisippaa, angut pineqartoq umiatsiami tillinniariarluni timmiarsiut paassartassaalu tillissimasani atorlugit aallaasersortoq.
Angerlamut ingerlatilluni sanioqquttoq timmiarsiummik qunusaarsimavaa. Kingorna silaannarmut pingasut sisamariarluni igeriarsimavoq, inissiarsuarnullu najugaqarfimminut angerlarluni.
Nuummi politiit immikkut pisoqartillugu sulisinneqartartut Paamiuni politiit tigusarinninniarnerannut ikiuukkiartorlutik tikittut, 21-nik ukiulik ajornaquteqanngitsumik nal. 10.20 tigusaraat.
Pisimasut politiinit misissuiffigineqarneranni paasinarsivoq angutip tigummiinnarneqarnissaanut tunngavissaqanngitsoq, taamaammat decemberip sisamaanni nal. 08.00 aallaasersorsimasoq iperagaasoq, Christer Nielsen ilisimatitsivoq.