Aallarnisaasunngortussat: Inuusuttut saarullinnik panertuliornermik isumassarsiaq ajugaassutigigaat
Fonden for Entreprenørskab - Kalaallit Nunaat workshopertitsinerani inuusuttut saarullik aallaavigalugu nioqqutissanik nutaanik pilersitsinissaminnut isumassarsinermi unammipput.
GUX-imiit, NI-miit, Ilinniarfissuarmiit Ilisimatusarfimmiillu inuusuttut 16-it septembarip 23-anni nutaaliorneq pillugu ataatsimoortinneqarput. Inuusuttut eqimattat tallimanut akulerullutik inissinneqarput, tamarmillu isumassarsiniarnermut oqallinnermi, niuertarfiup ingerlanissaanut pilersaarusiornermut aamma saqqummiussinissamut peqataalluarlutik. Inuusuttut inuussutissarsiornermi ingerlatsisuniit ilitsersuisoqarluarput.
Eqimattat ajugaasut saarullik aallaavigalugu peqqinnartumik chipsinik pilersitsinissaminnut saqqummiussaqarput, namminnerlu isumassarsiaat, niuertarfik ingerlanissaanut pilersaarutaat, suleqatigerusutaat kiisalu nioqqutissap akia pillugu annerpaamik pointinik nalilerneqarput. Aappaattut inissittut qimminut qitsunnullu saarullinniit igitassanngortinneqartartut atorlugit nerisassanik nioqqutissiorneq kiisalu pingajuattut inissittut amimut tarngut panernaveersaarummik saarullimmiit D-vitamininik ulikkaartumik pilersitinissaq isumassarsiarisimallugu. Isumassarsiat allat tassaasimapput neriniartarfik fish’n’chips fabrikkimillu pilersitsinissaq kiisalu Kalaallit Nunaanni aalisakkaniit uulianik qajuusanillu nioqqutissiornermik pilersitsinissaq.
Inuusuttut saarulliit assaminnik suliarinnillutik aallartipput.
- Nunat Avannarliit Killiit Ulluanni atatillugu saarullik aallaaviginissaa aaliangersimavarput, uagut pingaarnerpaatigut meeqqat inuusuttullu atortussamik tunineqaraangamillu nioqqutissiornissamullu pilersaaruteqarlutik isumassarsioraangamik tupinnartumik pisoqartarpoq, nunap immikkoortuani Fonden for Entreprenørskab Kalaallit Nunaanni ingerlatsisoq, Julie Rademacher oqarpoq.
Mentorit ilinniartitsipput
Saqqummiussilluarnerpaanut naliliisut tassaapput inuit namminneq aningaasalerinermik suliffeqarfimmilluaallartitsinermi misilittagaqartut Inuusuttut pitsaanerpaamik siunnersortinniarlugit ilitsersuisut mentorit pingasut qanoq aningaasaliiffigineqarnissaq siunertaralugu saqqummiinermi, nioqqutissamik niuertarfimmillu pilersitsiniarnermut pillugit saqqummiiffigitillutik.
Mentorit tassaapput Malou Mediamiit Martin Nordlun Madsen nammineq aallartitsisuusoq aningaasaliiffigineqarnissamullu saqqummiisareernikoq, Nuuk Couturemiit Louise Lynge Berthelsen nioqqutissamik niuertarfimmillu pilersitsiniarnermut misilittakkani pillugit saqqummiilluni kiisalu BankNordikimiit Thomas Tyt Mogensen niuertarfiup ingerlanissaanut pilersaarusiornermut, aningaasat pillugit missingersuusiornermut nioqqutissanillu akissaanik inississuinermut pillugit saqqummiilluni.
Fonden for Entreprenørskab Kalaallit Nunaat pilersinneqaqqammerpoq.
- Kalaallit Nunaanni aningaasaliiffigineqarnissaq siunertaralugu saqqummiineq takussaarpianngilaq kisia imatut aaqqissuussinermik amerlanernik ingerlataqarusuppugut, tassuunalu suleqatigiinneq inuiaqatigiillu iluaqutissaanik pilersitsineq siuarsarniarlutigu, tassuuna meeqqat inuusuttullu inuussutissarsiornermik ingerlataqartut naapeqatigiinneratigut, Julie Rademacher oqarpoq.