Aasianni aallaanninneq politimestereqarfimmit misissorneqalerpoq

Sisamanngornerup unnuaani Aasianni politiit illoqarfiup immikkortuani Nalunnguarfimmi angut 27-nik ukiulik aallaavaat.

Tamanna pivoq illumi perulluliornermut atatillugu, tamannalu maanna politimestereqarfimmit misissorneqalerpoq. Taamatut uppernarsaavoq Kalaallit Nunaanni Politimesteqarfimmi unnerluussisuuneq Morten Nielsen.

– Politeeq illuinnarsuumminik aallaariarsimagaangat suliassani taamaattuni periusaasarpoq politimestereqarfik killisiuisarluni, pisimasorlu iternga tikillugu misissortarlugu, pisimasup politiinut maalaaruteqartarfimmut saqqummiunneqannginnerani, Morten Nielsen nassuiaavoq.

Pissutsit naapertorlugit politeeq naliliisimavoq inuup inuuneranik peqqissusaanillu ulorianartorsiortitsisoqartoq, politiip illuinnarsuumminik aallaanninneranut tunuliaqutaasut pillugit Morten Nielsen nassuiaavoq.

Inatsisit tunngaviusut malillugit killisiorneqarpoq

Kalaallit Nunaanni Politimestereqarfimmi unnerluussisuuneq Morten Nielsen malillugu angut ´in absentia´-mik taaneqartartumik killisiorneqarsimasoq, tassa imaappoq unnerluunneqartoq killisiuinermi najuussinnaasimanngilaq.

Angut 27-nik ukiulik inatsisit tunngaviusut malillugit killisiuinermut atatillugu pisortani sulisumik sioorasaarisimasutut nakuusersimasutullu unnerluunneqarpoq.

Angut inuusuttoq taanna maanna Nuummi Dronning Ingridip Napparsimmavissuani uninngavoq, Politimestereqarfimmilu unnerluussisuuneq Morten Nielsen oqarpoq, angut ulluni 27-ni tigummigallagassanngortinneqarsimasoq.