Aasianni "illorsuit portusuuliat" siullersaat takukkit
Borgmester Ane Hansenip aamma Ineqarnermut Attaveqarnermullu Naalakkersuisup Karl Frederik Danielsenip Aasianni illuliat portusuut pingasut attartortittakkanik inissiartallit sanaartorneqarnissaat pingasunngornermi isumaqatigiissutigaat.
Aasianni inissaaleqineq annertuvoq. Inissarsiortut akornanni allattorsimaffik naapertorlugu inissarsiortut inissiat marlunnik pingasunilluunniit sinittarfillit pileriginerugaat nalunaarsukkami ersippoq, kommuni tusagassiuutitigut paasissutissiivoq. Taamaammat inissiat attartortittakkat nutaat 60-it sanaartorneqarnissaannik isumaqatigiissut borgmester Ane Hansenip nuannaarutigaa.
- TaamaaLilluni kommunitsinni initaarnissamut allattorsimasut amerlasuujusut maanna ikilissapput. Innuttaasut inissarsiornermi ininut mikinernut allatsissimasut maanna nuunnissamut periarfissaRissaalernerat nuannaarutissaavoq, borgmesteri oqarpoq.
Inissianit 60-iusunit Kommune Qeqertalik Ejendomsselskab A/S 40-nik akilerlugit sanaartortuussaaq, Namminersorlutik Oqartussat 20-nik akilerlugit sanaartortuussasoq.
Inissiarsuit pingasut pilersaarutit naapertorlugit aappaagu majimi saanaartorlugit aallartinneqassapput.
- Aasiaat portusuunik illorsuaqalernissaa pissanganartorujussuuvoq, inissiat tallimanik quleriilinni sananeqartussaammata, borgmester Ane Hansen oqarpoq.