Aasivik aallartilerpoq
Nuup Kangerluani inuiaqatigiiarannguanik pilersitsisoqassaq aasaanerani katerisimaarfik, 1970-ikkunni Aasiveqartarneratut ittoq, sapaatip akunnerata naanerani ammarneqarpat
Ikinngutigiit akornanni isumaliutitit oqaloqatigiissutitullu aallartippoq, maannalu isumassarsinerup kingorna ukioq ataaseq qaangiuttoq Aasivik piviusunngulerpoq.
Najaaraq Møller, Københavnimi pædagogisk sociologitut kandidatitut ilinniagaqartoq, ukiup affaa ilinniakkaminik uninngatitsisariaqarsimavoq suut tamaasa ataqatigiissinniarlugit.
Taassuma piumassutsimik sulisut allat qulingiluat peqatigalugit Aasivik, Kapisillit eqqaanni Ikkarlunni arfininngornermi juulip 21-iannit 29-annut ingerlanneqartussaq, aaqqissuuppaa.
- Soraarummeertussatut misigisimalaarpunga. Tamarmi naammassereernissaanut qilanaarpunga, aammattaarli qilanaaraara takussallugu suut tamarmik qanoq ingerlassanersut, tassami sorpassuaqarsimavoq pilersaarusiugassanik suliarlu annertoorujussuusimavoq, Najaaraq Møller oqarpoq
Inuiaqatigiinnguit
Ikkarlunni Aasivik 2012 inuiaqatigiinnguanik pilersitsissaaq allaffeqarluni, pisiniarfeqarluni, perusuersartarfeqarluni, igaffeqarluni, nakorsaqarluni, politeeqarluni, qatserisartoqarluni aammalu eqqaaveqarluni. Minnerunngitsumillu tuperujussuaq napparneqassaaq, silarlukkaangat aaqqissuussinerit tamarmik tassani ingerlanneqartassallutik. Pilersaarutaavoq tusarnaartitsinerit silami ingerlanneqartassasut.
- Suliat annersarisimavaat attaveqarnerup aaqqissuunnera aammalu inuit aaqqissuussanik sanasussat katersorniarnerat, aammattaarli isumannaatrsuunermut piareersarnerit aaqqissuussinermullu aningaasanik katersuiniarneq. Eqqarsaatigissagaanni siullermeersumik tamanna aaqqissuukkipput, taava kikkunnit tamanit tapersersorneqarluarsimavugut, Najaaraq Møller oqarpoq.
Tupermik nassarit
Aasaanerani katerisimaarnermi peqataassamaaruit isumassarsiatsialaavoq tupermik, sinngupuumik, nerisassanik, atisanik ikumasartumillu nassarnissat. Tupersuarmik igaffilimmik nappaasoqassagaluartoq naatsorsuutigineqassanngilaq aaqqissuussisut peqataasunik isumaginnissasut.
- Maani Nuummi aalisartut piniartullu peqatigiiffiat isumaqatigiissuteqarfigisimavarput pisaminnik nutaanik takkussisarnissaannik, nammineq nerisassiorusukkaanni pisiarineqarsinnaasunik, aammattaarli igaffimmi igariarlugit tuniniarneqartartussanik. Taamaattumik unnukkorsiutissanik nassanngitsoortoqarsinnaavoq, taamaakkaluartorli tamanna isumassarsiatsialaassaaq, nalugatsigu tamanut naammattunik nerisassaqartassanersoq, Søren Hans Lynge oqarpoq.
Susassareqatigiilluni
Aaqqissuussinermi tamarmi siunertaavoq susassareqatigiinnissaaq Najaaraq Møllerip misigisimasimavaa inuit imminnut ungasilligaluttuinnartut inuillu imminnut ungasinnerulissanngippata sumiiffimmik inuit ataartsimoorfigisinnaasaannik inuiaqatigiinnilu ajornartorsiutinik oqaloqatigiiffigisinnaasaannik atorfissaqartitsisimavoq. Qanga Aasivittut ittumik.
- Inuiaqatigiinni ajornartorsiutit ataatsimoorutigaavut, pingaaruteqarporlu misigisimassasugut tamatta pisunut akisussaaqataasugut. Taamaattumik ullut tamaasa oqallittoqartassaaq assigiinngitsunillu saqqummiussisoqartassalluni, aaqqissuussinerit kulturimut tunngasut saniatigut, Najaaraq Møller oqarpoq
Pisussat tamakkiisut Nuuk Ugeavisimi takukkit