Ajunaarnersuarmut eqqugaasunut Kujalleq 50.000 koruuninik tunissuteqarpoq

- Uummatinnit pisumit aammalu Kommune Kujalleq sinnerlugu ajunaarnersuarmi eqqugaasunut tamanut misiginneqataangaarnera matumuuna apuutissavara.

Kommune Kujallermi borgmesteri Kiista P. Isaksen tusagassiuutinut nalunaarummi taama oqarpoq.

Taassuma kommunip tunissutai 50.000 koruunit Kalaallit Røde Korsiata Qaqortumi immikkoortoqarfianut tunniuppai.

- Tuparujussuaqqavugut, pakasarneqarujussuarpugut, oqaasissaaleqivugut, iliuuseqarpugulli. Ataatsimoorpugut, aliasoqatigiippugut eqqugaasullu ataatsimoorluta qinnullugillu pillugit tussiarpugut. Innuttavut aammalu Kommunit allat innuttaat ajunaarnersuarmi eqqugaasunut erngertumik atisanik, pinngussanik, igaffimmi atortunik pisattanik il.il. katersuinialerput.

- Qularinngilluinnarpara ajunaarnersuarmi eqqugaasut aamma aningaasatigut taperserneqarnissaminnik pisariaqartitsisut, taamaammat Kommune Kujalleq sinnerlugu aalajangerpunga kommunerput 50.000 kr.-inik tapiissuteqassasoq, aningaasat taakku Kalaallit Røde Korsiata Qaqortumi immikkoortortaqarfianut, ulluni qaninnerni ajunaarnersuarmi eqqugaasunut katersuiniarnissaminnik aaqqissuussisunut tunniutissavavut. Kalaallit Røde Korsiat katersuiniarnerminik iluatsitsilluarumaartoq kissaatingaarparput, Kiista P. Isaksen oqarpoq.

Kalaallit Røde Korsiata Qaqortumi immikkoortoqarfiata tamatuma saniatigut ilisimatitsissutigaa, inuit kajumissutsiminnik iliuuseqartut eqimattat aamma Kalaallit Røde Korsiata pingaarnertut allaffeqarfianik suleqateqarnikkut Nuugaatsiami eqqorneqartunut aningaasanik katersuiniarnermik aallartitsisimasut.

Gruppi taaguuserneqarsimavoq 'Nuugaatsiaq tapersersortigu - Støt Nuugaatsiaq', taakku pingasunngorpat inuiattut ullorsiortoqarnerani takussaassapput.

- Aammattaaq Nanortalimmi, Narsami nunaqarfinnilu taamatut iliuuseqarsinnaasunik nassaarnissarput sulissutigissavarput, Qaqortumi Røde Korsip immikkoortoqarfia allappoq.

Qaqortumi radio 'Seekon Radio' aamma 20.000 koruuninik tunissuteqarpoq.