Akerliussutsimik takutitsinissaq angajoqqaanit taperserneqartoq

Kommuneqarfik Sermersuup meeqqat atuarfiinut 10 million koruunit missaannik sipaarniuteqarnissaat pillugu Atuarfik Ukaliusami ilinniartitsisut akerliussutsimik takutitsissapput. Angajoqqaat meeqqat atuarfiini atuartuutillit ilinniartitsisut tapersersorlugit akerliussutsimik takutitseqataassapput.

Kommuneqarfik Sermersooq 9,5 million koruuninik meeqqat atuarfiinut sipaarniuteqassapput. Ilinniartitsisut ilinniaqqittarnerat atuartitsinermilu atorneqartartut sipaarutigineqassapput.

- Ernumassuteqarnerput takutinniarlugu akerliussutsimik takutitsinermi peqataassaagut, akerliussutsimut takutitsinissami aaqqissueqataasoq Mette Rasmussen Larsen oqarpoq.

Mette Rasmussen Larsen meeqqat atuarfiani atuartunik marlunnik qitornaqarpoq, 1. klassimi atuartumik aappaalu 9. klassimi atuartumik. Sipaarniartoqarnissaalu ernumagaa.

- Meeraqarpunga immikkut pisariaqartitsisumik, naluaralu sipaarniartoqarneranut qanoq atuarnerminut eqqugaassanersoq, Mette Rasmussen Larsen oqarpoq. Suut sipaarniarfigineqassanersut qanorlu agguataarneqartussaanerat nalunaarutigineqarsimannginnera ernumanartoqartippaa.

Politikkerit tupigusuutigai

Mette Rasmussen Larsenip paasisinnaanngilaa sooq Kommuneqarfik Sermersuup atuarfiit sipaarniarfiginiarneraat, oqartoqartarmammi meeqqat atuarfiininngaannit anisut ilisimasakippallaarlutik naammassisartut.

- Paasisinnaanngilara sipaarniarnerup qanoq ilinniartitaanermut iluaqutaassanersoq, Mette Rasmussen Larsen oqarpoq, maluginiaqquaalu meeqqat atuarfiannit anisut angusaluppallaarlutik anisarnerat maannakkut oqallisaammat.

- Meerartagut ajunnginnerusumik aallarnissaannut aningaasat pisariaqartinneqarput, taamaattumik neriuutigaara politikkerit allanik sipaarniarfiusinnaasunik nassaarumaartut, oqarpoq.

Kommuni angajoqqaallu oqaloqatigiinnerunissaat pisariaqartippaa.

- Angajoqqaat kommunimit tusarniarneqarnikuunngillat sipaarniarneq qanoq isumaqarfigineqarnersoq, tamanna tupigusuutigaara, Mette Rasmussen Larsen oqarpoq.

Mette Rasmussen Larsenip angajoqqaat meeqqat atuarfiani atuartunik qitornaqartut akerliussutsimut takutisinissamut peqataanissaanik kaammattuuteqarpoq. Akerliussutsimik takutitsineq Nuummi Ukaliusap Atuarfiata kantiinaani februaarip 20-ani nalunaaqutaq 16.30 aallartissaaq.