Akerliussutsimik takutitsineq
Akerliussutsimik takutitsinissaq ima ingerlanneqassaaq
Inatsisartut immikkut ittumik ataasinngorpat katersuuppata akerliussutsimik takutitsisoqassaaq, nutaamik qinersisoqarnissaa piumasaqaatiginiarpaat
Inatsisartut immikkut katersuunneranni januaarip 27-ani ingerlanneqartumi Finn Karlsen Siumut Aalisarnermut, Piniarnermut Nunalerinermullu Naalakkersuisunngortinneqassaaq.
Inatsisartut immikkut katersuunneranni akerliussutsimik takutitsisoqassaaq. Akerliussutsimik takutitsisut Naalakkersuisut Siulittaasuannut kaammattuuteqarniarput nutaamik Inatsisartunut qinersisoqassasoq.
Internetsi aqqutigalugu inuit 1250-it nutaamik qinersisoqarnissaanik kissaateqartut atsioqataapput.. Aqqusinermi atsiortitsinerit ilanngullugit maannakkut atsiornerit 1500-pput.
Akerliussutsimik takutitsineq Giiti Tittussenimit Kristine F. Petersenimiillu aaqqissorneqarpoq, ataasinngorpallu januaarip 27-anni nalunaaqutaq 12.00 aallartinneqassalluni.
- Amisut eqqaaniit aallartissaagut, Brugsenip eqqaatigut Aqqusinersuakkullu ingerlaarluta, Inatsisartullu ataatsimiittarfiat tikissallugu, aaqqissuisut nalunaarput.
Facebookkimi quppernermi 'Demonstration imod Naalakkersuisut' - Naalakkersuisunut akerliussutsimik takutitsineq - akerliussutsimik takutitsisussat arfininngornermi januaarip 25-anni piareersassapput, nalunaaqutaq 14.00-imiit 17.00-ip tungaanut Atuarfik Samuel Kleinschmidtsip atuarfiata sanaluttarfiani allagartarsuarnik akerliussutsimik takutitsinermi atugassanik sanasoqassassalluni.
Giiti Tittussen Kristine F. Petersenillu ilisimasitsissugaat partiimut sumulluunniit attuumassuteqaraluaraanni akerliussutsimut takutitsinermi kikkut tamarmik peqataanissamut tikilluaqqusaammata.