Aki-Matildap imaani isumannaallisaaneq aamma inatsisilerinikkut nassuiaatit ineriartortinneqarnissaat sulissutiginiarpai
Danmarkimi aningaasanut inatsisissamut isumaqatiginninniarnerit aallartipput, Aki-Matilda Høegh-Damilu (S) arlalinnik kissaateqarluni isumaqatiginninniarpoq, ilaatigut Kalaallit Nunaata avataani imaani isumannaallisaanerup pitsanngorsarneqarnissaa, atuakkap 'Imperiets Børn' kalaallisuunngortinneqarnissaa kiisalu inatsisilerinikkut nassuiaatit ineriartortinneqarnissaannut aningaasanik kissaateqarpoq.
Danmarkimi 2023-mut aningaasanut inatsisissamut isumaqatiginninniarnerit ingerlapput, ukiaq Folketingimut qinersisoqarnera pissutigalugu ingerlanneqanngimmata.
Danmarkimi naalakkersuisut sukkasuumik isumaqatiginninniartoqarnissaa siunniuppaat, Folketingimullu ilaasortaq Aki-Matilda Høegh-Dam (S), isumaqatiginninniarnissamut pingaarnersiukkani piareersimatillugit, Sermitsiaq.AG-mut ilisimatitsivoq.
Kalaallit Nunaanni imaani isumannaallisaaneq annertusarneqassasoq, Folketingimut ilaasortaq allagaqarluni akissuteqarnermini ilisimatitsivoq, taamaammallu Siumup ikkarlunnik, sinerissap killinginik aamma ulittarnernillu nalunaarsuisoqarnissaanut aningaasanik immikkoortitsisoqarnissaa anguniarnarpaa.
- Assiliortoqannginnera ukiut tamaasa ajutoornernik kinguneqartarpoq kiisalu inunnik atortunillu annaasaqarfiusarluni, kiisalu inuussutissarsiornermik ineriartortitsinissamut pinngitsoortitsisarluni, Folketingimi ilaasortaq oqarpoq.
Atuagaq nutserneqartariaqarpoq
Tamatuma saniatigut Operation dagsværk Inua-nut aningaasaliisoqarnissaa Siumup sulissutiginiarpaa.
Aki-Matilda Høegh-Damip oqarnera naapertorlugu peqatigiiffik ukiuni arlalinni inuusuttunik Kalaallit Nunaanni tapersersuinermik misilittagaqarpoq, ukiunilu sisamani tulliuttuni kalaallit inuusuttut 1.600-t Tarnikkut ikiueqqaarnermik aamma Inuunerissaarnissamik pikkorissartinniarpaat. Inuusuttut inuuniarnikkut ajornartorsiuterpassuit naapitatik qanoq iliuuseqarfiginissaannut piginnaasaasa nukittorsarnerisigut, tarnikkut peqqissutsip pitsanngorsarnissaa anguniagaavoq.
Pingaartinneqartussaq alla tassaavoq atuakkap 'Imperiets Børn'-ip Anne Kirstine Hermannimit atuakkiaasup nutserneqarnissaa. Atuagaq Kalaallit Nunaata nunasiaataajunnaarneranut atatillugu qanoq ililluni Danmarkimi amteqarfinngorsimanera pillugu sulia ingerlaneranut tunngavoq.
- Atuakkap ’Imperiets Børn’ qallunaatuumit kalaallisuunngorlugu nutserneqartariaqartoq, Siumut isumaqarpoq, taamaalilluni Kalaallit Nunaanni innuttaasut amerlasuut aamma piffissami tassani piviusumik qanoq pisoqarsimanerata paasisaqarfiginissaanut periarfissaqalissammat, Aki-Matilda Høegh-Dam oqarpoq.
Peqatigiiffinnut marlunni tapiissuteqarnissaq kissaatigineqartoq
Peqatigiiffinnut marlunnut Mentor Immanuelimut aamma MAPI-mut, ilaatigut kalaallinut angajoqqaanut Danmarkimi oqartussanut attaveqarnermi ikiuisartunut aningaasaliisoqarnissaa aamma kissaatinut ilaavoq.
Aki-Matilda Høegh-Damip inatsisilerinikkut kalaallit oqaasiinik ineriartortitseqataasussamik aningaasanik pissarsinissaq aamma neriuutigaa, inatsisitigut taaguusersuutit annertunerusumik kalaallisut nassaassaannginnerat pissutigalugu. Aammattaaq Siumup ’Foredrag i Postkoloniale teorier’-imut aningaasaliisoqarnissaa kiisalu inatsisinut tunngasumik ph.d.-liornissamut spiralilersuinermik qulaajaasussamut tunniussaqartoqarnissaa kissaatigaa.
Aningaasanut inatsisissamut isumaqatiginninniarnerup saniatigut illersornissamut isumaqatigiissuteqarnissamut Folketingimi isumaqatiginninniartoqaleruttorpoq.