akit qaffariartut
Allakkanik nassiussineq akisunerulissaaq
Ukiup tulliani frimærkit akii qaffassapput
Ukiup tulliata aallartinnerani ilaquttanut illoqarfinni allaniittunut allakkamik nalinginnaasumik 20 gramimik oqimaassusilimmik nassiussineq 1 koruunimik akisunerulissaaq. Tassami Tele-Postip allakkanik nassiussinermut akit qaffaqqammerpai.
Allakkat timmisartukkut nassiunneqartut kisimik akitsuinernut eqqugaassapput, umiarsuakkut allakkat nassiunneqartut allannguuteqassanngillat.
Tele-Postip nittartagaani akinut paasissutissani tamanna takuneqarsinnaavoq.
Assersuutigalugu Europamut postkortimik nassiussineq 1,50 koruunimik qaffappoq. Allakkat 2 kiilumik oqimaassuseqarptaa, nunatsinnilu illoqarfimmut allamut timmisartuunneqassagunik, taava frimærki januaarimit 145 koruuninik akeqalissaaq, tamannalu 7 koruuninik qaffariaateqarpoq.
Poortukkat angisuut akii appariartut
Poortukkanilli nassiussineq akikinnerulissaaq.
- Ukiumi nutaami poortukkanik angisuunik nassiussineq akikinnerulissaaq. Poortukkanik Nunatsinneersunik, Nunatta iluani aammalu avammut nassiussanut akit assigiissaarneqassapput, taamaalilluni apeqqutaarujussuarunnaassaaq poortugaativit qanoq oqimaatsiginera, Tele-Post ilisimatitsivoq.
- Allannguutit kingunerissavaat, poortukkanik Kalaallit Nunaanni nassiussinermi poortukkanut 0-50 kg-nut oqimaassusilinnut tamanut akip tunngaviusup 91 kr.-nngornissaa, ullumikkummi aki tunngaviusoq poortukkap oqimaassusaanut naleqqiullugu allanngortarmat, tusagassiuutinut nalunnaarummi Tele-Post allappoq.
Nunanut allanut poortukkanik nassiussinernut aamma taamatut allannguuteqartoqassaaq.
Atuaruk: Ikummatissamik pisineq akikinnerulerpoq