hashimik eqqussineq
Allakkerivimmi sulisut hashimik eqqussuisut
Saniatigut aningaasarsiatsialaapput. Nalunngeqatiginnissuserli artorsartitsivoq. Taamaammallu allakkerivimmi sulisut marluk pisortaminnukarlutik imminnut oqaatigipput. Eqqussuinermili aqutsisoq aamma paasisaavoq. Qanittumilu suliaq eqqartuussivimmi qaqilerneqarpoq
Allakkerivimmi sulisuusimasut marluk 22-nik 24-inillu ukiullit sapaatit akunnerani kingullermi tatigisaasutut atorfeqaraluarlutik aaqqissuussamik katillugit hashimi 2 kiilunik nunatsinni eqqussisimagaluartut, taamaallaat ukiup affaanik sivisussuseqartumik isertitsivimmiitinneqarnissamik, nalunaaquttallu akunnerini 100-ni inuiaqatigiinnut kiffartuussisussanngorlugit pineqaatissinneqarput. Eqqartuussinerullu taamak sallaatsigineranut, angutit marluk imminnut oqaatiginerat patsisaavoq. Peqatigisaanillu eqqussuinermik aqutsisoq 32-inik ukiulik, ukioq ataaseq pineqaatissinneqartunut inissiisarfimmiittussanngorlugu eqqartuussaatippaat.
Angutit inuusuttut marluk tamarmik immikkut 80.000 koruuninik arsaarinniffigineqarput, aqutsisorlu 380.000 koruuninik akiliisinneqassasoq piumasarineqarpoq.
Suliarlu unnerluussisumit illersuisunillu immikkuullarissutut oqaatigineqarpoq.
Allaaserisaq tamaat AG-mi saqqummertumi kingullermi atuaruk, aviisimi aamma saqqummiunneqarpoq 'Hashimik tuniniaasartut pigisaminnik malunnarunnaarsaartut'. AG normu 28 uani pisiariuk: