Angalaniarnikkut aaqqiissutissat ukioq manna aaqqinneqarnissaat Danielsenip qularaa

Angalaniarnikkut ajornartorsiutit Aningaasaqarnermut Akileraartarnermullu Ataatsimiititaliaq pissutaalluni aaqqinneqarnavianngitsut naalakkersuisoq Karl Frederik Danielsen isumaqarpoq.

- Suliaq Aningaasaqarnermut Akileraartarnermullu Ataatsimiititaliamit itigartinneqarmat, tulleriiaarinissat nutaat 2019-imi angumerineqarsinnaajunnaarnissaat annilaangassutigaara, tusagassiutinut nalunaarummi oqarpoq.

Naalakkersuisuniit kiffartuussinermut isumaqatigiissutit pitsannguutissaannut siunnersuutit ataatsimiititaliamit itigartinneqarput. Tassani 8 million koruunit angallannerup pitsaanerulernissaanut atorneqartussaapput.

- 8 mio. koruunit, pitsannguinermut atorneqartussaagaluit atuutinngitsoortissagigut annilaangassutigilerpara. Piffissaarukkiartorpugut, aammalu pitsannguutissatut siunnersuutigineqartut ukioq manna atuuttussanngortinneqarnissaat ilimanarunnaarmat, tamanna Naalakkersuisuniit innuttaasunut utoqqatsissutigissavarput, naalakkersuisunut ilaasortaq oqarpoq.

Karl Frederik Danielsen oqarpoq, Naalakkersuisut oqimaaqatigiissaakkamik tulleriaarisimallutik uani suliami.

- Kiffartuussinermut isumaqatigiissutit pitsannguutissaannut ukiumut 8 mio. koruunit aningaasaliissutaasartussat aningaasarpassuusut ilisimaaraara – kisiannili aamma nalunngilara, aningaasat angallannermi atussallugit amerlavallaanngitsut. Qulimiguullit pisinnaasaasa imaluunniit Artic Umiaq Line-p tikittarnerisa ilaneqarnissaat akisuujuvoq. Aamma aningaasat atugassiissutigineqarnissaannut piffissaalluarallartillugu pilersaarusiortoqartariaqarpoq, Karl Frederik Danielsen oqarpoq.