Air Greenland
Angalasut Kulusummi aallarneq ajulertut
Sapaatip-akunnerata siuliani mittarfimmik suliaqarneq pissutaalluni Kulusumi mittarfik matuneqarsimavoq. Tamanna Kulusummut Kulusummiillu timmisartuussinernik allannguivoq.
Mittarfimmi pissutsit peqqutigalugit Kulusummut Kulusummiillu timmisartuussisarnerit allanngortinneqarput, ilaasorpassuit
kinguaattoornerinik kinguneqarmata.
Air Greenland tusagassiuutinut nalunaaruteqarpoq.
Ullumi aqagulu timmisartuussinerni ilaasut 50-it5 apuunneqassapput, kiisalu ilaasut 17-it ataasinngornermi nal. 12.00 angalanissanut pilersaarummik nassiussivigineqassapput.
Kinguaattoornernut Mittarfeqarfiit Kulusummi mittarfimmi pilersaarutaasumik suliaqarnerat peqqutaavoq. Mittarfimmi suliat kinguaattoorfiupput, sumiiffimmilu siallerujussuarnera peqqutigalugu akimmisaartinneqarlutik.
Tamatuma kingunerisaanik sapaatit akunnerata naanerani qaangiuttumi mittarfik piffissap ilaani atorneqarsinnaasimanngilaq mittarfillu matoqqatinneqartarluni. Mittarfimmi iluarsaassinerit sukkanerusumik ingerlanissaat anguniarlugu Mittarfeqarfiit mittarfik
naannerulersittariaqarsimagaat Mittarfeqarfiit Air Greenlandimut nalunaaruteqarput.
Tamatuma kingunerisaanik mittarfimmi ujaraaqqanik 800 meterit kisimik timmisartorfigineqarsinnaasimapput, tamannalu Air Greenlandip ilaasorisinnaasaasa amerlassusissaannut killiliivoq. Aamma mittarfimmi sulinermi mittarfiup qullii killilersorneqarput, taamaattumillu Air Greenlandip mittarfimmut timmisartuussisarneranut piffissat killeqarlutik.
Mittarfeqarfinniit ilisimatitsissutigineqarpoq, mittarfimmi sulineq septembarip ulluisa 23-ata tungaanut ingerlaqqinnissaa naatsorsuutigineqartoq. Taamaattumik mittarfimmi sulineq aamma sapaatit akunneranni tulliuttumi Kulusummut Kulusummiillu angallannissamut pilersaarutini allannguinermik nassataqarsinnaavoq.
Air Greenlandimiit ilaasut kinguaattoortut utoqqatserfigineqarput, uppernarsarneqarsinnaavorli ilaasut tamarmik pilertornerpaamik apuunnissaat anguniarlugu suliat sapinngisamik nukingiullugit ingerlanneqarmata.