Kitaani silarluppoq
Angallassinerup suliassanngortinneqarnera 'Immanuel'-imit eqqissisimasumik tiguneqarpoq
Imaatigut ajutoortoqarsimatillugu angallassisoqarsimanera misissuisartunut angalaqataasunit tunniunneqarnera 'Immanuel'-imit eqqissisimasumik tiguneqarpoq
- Ernera takoqqissavara? Angalatissimassanngikkaluarpara? Isumakkeerfigiumaarpaanga?
Ernini qulinik ukioqartoq 'Immanuel'-imut ilaatereerlugu Gitte Lynge Rosing taama eqqarsaateqarpoq.
Atuartut angallammi ilaasut, ilinniartitsisut, angajoqqaajusut ilaqutaasullu Atuarfik Samuel Kleinschmidtimi tallimanngornermi pisoq pillugu oqaloqatigiinnikkut ikiuigasuartoqarpoq. Angajoqqaajusunit Imaatigut ajutoortoqarsimatillugu misissuisartunut tunniunneqarpoq Imarsiornermik Qullersaqarfimmulluunniit angallammi isumannaallisaanerup pitsaannginnera pissutigalugu tunniussisoqarluni.
Tunniussisoqarnera 'Immanuel'-imi siulittaasumit Hans Sivertsenimit eqqissisimasumik tiguneqarpoq.
- Inuit tunniussisinnaatitaaffeqarput. Oqarsinnaanngilangami tunniussisinnaanngitsut, Sermitsiaq.AG-mut oqarpoq.
Angallat 'Immanuel' 40 fodseqarpoq Jupiteriusoq, Nuummit Qoornuliarpoq Atuarfik Samuel Kleinschmidtimi atuartut aallaarsimaartut aallugit sisamanngornerup ullaani. 25-nik ilaasoqarluni Nuummukarpoq, anorlerlunilu siallernera pissutaalluni nunamut angummannaveeraluarput. Angallatip nunamut tulanniarsarinera angajoqqaasunit ilaqutaasuniillu isiginnaarneqarpoq.
Kukkusoqarneratigut angallassisoqartoq Hans Sivertsenip tallimanngornermi apersorneqarnermini oqaatigaa.
- Eqqarsaatigilluaraanni paasisinnaavarput umiatsiamik silarlutsillugu meeqqanik angallassineq eqqarsaat pitsaasuunngilaq, taamaattumik taamaasiortoqarnera utoqqatsissutigaarput. Pisoq illersorneqarsinnaanngilaq, oqarpoq.