Angallatip takornariartaatip kivinera politiit misissorpaat

Takornariartaatip 'Inuk II'-p kivineranut suna pissutaanersoq, Imarsiornermik Aqutsisoqarfik suleqatigalugu maanna politiit misissuipput.

Taassuma kivinera sapaammi unnuakkut Ilulissat Kangerluani pivoq.

Assit takukkit: Angallat takornariartaat minutsit qulit ingerlanerini kivivoq

Pisoq qulaajarneqassaaq
- Qanoq pisoqarsimaneranik ilimanarsinnaasunik suliaqarpugut, kisianni oqaaseqannginnitsinni pisoq tamaat qulaajaqqaarniarparput, Qaasuitsup politiivini aqutsisoq, Sebastian Bech, tusagassiuutinut nalunaarummi oqarpoq.

Kivisoq pillugu politiit nalunaarfigineqarmata ilaasut tamarmik annaanneqareersimapput. Tamatuma kingorna politiit annaassiniartartut upalungaarsimasut nalunaarfigaat, taamaalilluni uuliarluarnerit oqartussanit suliarineqarsinnaaniassammata, aammalu avatangiisit pillugit iliuuseqarnissamik piareersartoqarniassammat.

Atuaruk: Angallat takornariartaat 26-nik ilaasulik kivisoq - tamarmik annanneqarput

Inuttanut nersualaarisut
Politiit inuttanik apersuiartortitsillutik umiarsualivimmukartitsisimasut, Sebastian Bech oqarpoq. Aammattaaq umiarsuaq takornariartaat L'Austral saaffigineqarsimavoq, politiit angallammi kivisumi 'Inuk II'-mi ilaasut allattorsimaffiat pissarsiarisimavaat.

Sebastian Bechillu inuttat sukkasuumik qisuariarsimammata nersualaarpai.

- Ilaasut inuttallu tamaasa angallatip aappaanut, 'Clane'-mut, ikaartinnissaat iluatsippoq, taanna ungasinngitsumiippoq sukkasuumillu angallammut apuuppoq. 'Clane'-p qimagussortinneqartut umiarsuarmut takornariartaammut, takornariat taakku ilaaffigisaannut ikaaruppai,

- Taamaattumik aamma 'Clane'-mi aquttumut inuttaanullu peqqissaasunngorniartunut marlunnut nersualaarisoqartariaqarpoq, taakku inuit 'Inuk II'-miittut ingerlaannaq isumagisimavaat, Sebastian Bech oqarpoq.