Aningaasanut inatsit piffissaq kingulleq atorlugu akuersissutigineqarpoq

Tallimanngormat unnukkut 2014-imut aningaasanut inatsit akuersissutigineqaqqarpoq, landskarsip ukiuni aggersuni aningaasaqarniarnera assortuussutigalugu oqallisigeqareersoq. Tupinnanngitsumik naalakkersuisooqatigiit illua'tungeriillu imminnut ungasissorujussuupput.
Inatsit 20 millioner koruuninik sinneqartooruteqartussanngorlugu akuersissutigineqarpoq. Sinneqartoorutillu tamakkua aalisarnikkut akilerneqassapput landskarsimut akitsuutitigut. Tamatuma saniatigut 2014-imi sinneqartooruteqarnissamut ilapittuutaassaaq Namminersorlutik Oqartussat Grønlandsbankimi piginneqatigiissutaasa tunineqarnerat. Namminersorlutik Oqartussat Grønlandsbankimi piginneqatigiissutaat 13,7 procentiupput, 2005-imiillu landskarsimutd 62,9 millioner koruuninik isertitsissutaasarlutik.
Akerlianik sipaarniarfigineqassapput sanaartorneq, ICC kulturilu, ilaqutariillu atugarliornerpaat immikkut meeqqanut tapiissutinik ikiorserneqassapput.
Inatsit malillugu aningaasanut inatsit tallimanngorpat akuersissutigineqartussaavoq - piffissarlu kingulleq atorlugu akuersissutigineqarpoq tallimanngormat unnukkut nalunaaqutaq 23 missaani taasissutigineqarami. 16-it isumaqataallutik taasipput, 11-illu akerliullutik taasillutik. IA aamma Demokraatit akerliullutik taasipput.
Inernera qanoq isumaqarfigaajuk?