Aningaasarpassuit siunnersortinut atorneqartartut

Namminersorlutik Oqartussat siunnersortinik qanoq atuitiginerat paasiniarlugu, Aningaasaqarnermut Naalakkersuisoqarfik misissuititsisimavoq.

2017-imi 2019-imilu aningaasanut inatsisissamik isumaqatigiissuteqarnermut atatillugu partiinit arlalnillini paasiniaasoqarsimanera tunngavigalugu misissuisoqarpoq. Inatsisartut Kukkunersiuinermut Ataatsimiititaliaata aamma siunnersortinik atuisarneq siusinnerusukkut paasisaqarfigerusussimavaa.

Tamatuma saniatigut misissuineq pitsaanerusumik aningaasaqarnermik aqutsinissamut susassaqarfinnilu sipaarutaasinnaasunik tikkuussinissamut atorneqassasoq, nalunaarusiami allassimavoq.

Misissuinermi paasineqarsimavoq Namminersorlutik Oqartussat sinnersortinik 2012-imiit 2019-imut agguaqatigiissillugu 165 millioner koruuninik atuisimasut.

1,93 milliarder koruunit aningaasarsianut atorneqarsimasut

Assersuutigalugu atuarneqarsinnaavoq, Namminersorlutik Oqartussat 2016-imi 1,93 milliarder koruunit sulisut aningaasarsiaannut atorsimagaat.

- Namminersorlutik Oqartussat siunnersortit kiffartuussinerannik atuinerannut sulisorisat akissarsiaqartinneqarnerannut sanilliukkaanni tamanna akissarsiat annertussusiisa 8,5 %-erigaat takuneqarsinnaavoq, misissuisimanermi allassimavoq.

Namminersorlutik Oqartussat siunnersortinut qanoq atuisartiginerisa misissuiffigineqarnissaat pisariaqarsimavoq, Namminersorlutik Oqartussat aningaasaqarnikkut atortorissaarutaannit kisitsisinik pissarsisoqarsinnaasimannginnera pissutigalugu.

Misissuinissaq pisariaqarsimasoq

Misissuinermi GEUS-imi geologit immikkut ilisimasallit misissuisarnerannut, peqqinnissaqarfiup ulluinnarni ingerlanneqarnerani nakorsanut peqqissaasunullu taartaasartunut kiisalu tarnip nakorsaattut isumaginninnermut atatillugu angalaqatigiittartunut aningaasartuutaasartut ilanngunneqarsimanngillat.

Naalakkersuisoqarfiummi misissuinermi taakkununna aningaasartuutaasartut ilanngusimmanngilai, naalakkersuisoqarfik isumaqarmat taakku siunenrsortitut atorfiunngiutsut. Sulisummi aalajangersimasumik atorfillit assigalugit pineqarmata.

Aningaasaqarnermut Naalakkersuisoqarfiup nalunaarusiami pisarnertut suliakkiissut sullissinertut nassuiarsimavaa imatut, ”tamannalu immikkoortortap ileqquusumik ingerlatsinerata avataaniittarpoq, piffissaliinermilu killigaasarluni, immikkoortortarlu suliassamik inniminniisoq ataavartunik inaarutaasunillu inerniliussanik pingaarnertut akisussaasuusarpoq.”