Anna W.: Nuummi kigutit narlorsarneqarsinnaanissaat suli misissorneqarpoq

Nuummi meeqqat kigutaasa narlorsarneqarnissaannut neqerooruteqarnerup ingerlatiinnarneqarnissaa Naalakkersuisunit suli misissorneqarpoq. Taamaammat kigutit narlorsarneqartarnissaannut neqerooruteqarnerup unitsinneqarnera atuutiinnassanersoq imaluunniit neqerooruteqartoqaqqilissanersoq suli aalajangertoqanngilaq.

Peqqissutsimut naalakkersuisoq, Anna Wangenheim (D), Sermitsiaq.AG-mut allakkatigut akissuteqarluni nassuiaavoq.

- Kigutit narlorsarniarlugit bøjlelersuisarnermut neqerooruteqarneq Nuummi aallarteqqinneqarnissaanut sulisoqarnikkut suleriutsimilu akisussaassuseqarnerussanersoq pillugu, maannakkuugallartoq misissuisoqarpoq. Naalakkersuisut aalajangereerpata, tamanna nalunaarutigineqarumaarpoq, Anna Wangenheim nassuiaavoq.

Taanna siornatigut nassuiaareerpoq Nuummi periarfissaqartoqartillugu unitsitsiinnarnissaq isornartoqartillugu. Taassuma siulia, Martha Abelsen, maajip naalernerani nalunaaruteqarpoq Nuummi meeqqat kigutaasa narlorsartinneqarnissaannut neqerooruteqarfigineqarnerat unitsinneqassasoq, sinerissami periarfissaqartoqannginnerani assigiinngisitsinerummat.

Ukiuni pingasuni unitsitsiartuaarneq

Anna Wangenheimip erseqqissarpaa kigutinik narlorsaasarneq "oqaluttuarisaanermi nuna tamakkerlugu neqeroorutaasimanngisaannartoq", tamannalu arlaleriarluni nalunaarutigineqartareersoq. Sumiiffiit ilaanni kigutit narlorsarneqarneranni bøjlelersuisarneq kigutilerisunit nalinginnaasunit atorneqartarsimavoq, piumasaqaatilli sukaterneqarneri malillugit tamanna atorneerussimalluni.

Suliami aalajangertoqartinnagu Nuummi kigutit narlorsarneqarnissaannut neqeroorutip ukiuni tullerni pingasuni unitsikkiartuaarneqarnissaannut aalajangerneq atorneqassasoq, naalakkersuisoq ilisimatitsivoq.

- Piffissami taaneqartumi sullinneqartut tamarmik naammassereersimassapput, utaqqisunilu allattorsimasut aamma bøjlelersorlugit sullinneqarnissamut neqeroorfigineqassallutik, Anna Wangenheim nassuiaavoq.

Ilanngullugu nassuiaavoq nuna tamakkerlugu kigutinik isumaginninnermut neqerooruteqalernissaq pillugu naalakkersuisut ataatsimoortut aalajangigassaqartut. Tassanilu kigutinik narlorsaasarneq aalajangiiffisassanut ilaatinneqartoq. Allamik nalunaartoqanngippat, kigutit nakorsaat immikkut ilisimasallit siunnersortitut atorneqartartut, ukiullu tamaasa tallimariarlutik arfinileriarlutilluunniit nunatsinnut tikittartut kigutinik nalorsaanermik suliaqariartorlutik, atorneqaannarallassasut ilisimatitsissutigaa.

Kigutit nakorsaannik immikkut ilisimasaqartunik siunissami atorfinitsitsisoqarnissaannik naalakkersuisut anguniagaqarnissamik takorluugaqarnersut pillugit apeqqut peqqissutsimut naalakkersuisup akisinnaanagu ilisimatitsissutigaa, kigutit nakorsaasa pisortaata sulinngiffeqarnera pissutigalugu.