Anna Wangenheim: Soorunami Inatsisartuniit sulinngiffeqassaanga
Peqqissutsimut Naalakkersuisunngorlaap Anna Wangenheimip erseqqissaatigaa, marlunnik qinigaaffeqarnissaq siunertarinngilluinnarlugu.
Demokraatit siulittaasorigallangaata Nivi Olsenip nalunaarutigimmagu, partiimi naalakkersuisunngortut marluk maannakkorpiaq Inatsisartunit sulinngiffeqassanngitsut, Steen Lyngep Anna Wangenheimillu Inatsisartunit sulinnngiffeqarnissamik qinnuteqarsimannginnerat oqallisaasimaqaaq.
- Marlunnik qinigaaffeqartarneq tunngaviatigut akerlerisuuara. Qularinngilluinnarpara Inatsisartut ukiamut katersuuppata, sulinngiffeqassallung, taanna oqarpoq.
Marlunnik qinigaaffeqarnissaq siunertarinngisaannaraa
Anna Wangenheim oqarpoq, Steen Lyngelu sulinngiffeqarnissaq pillugu ingerlaannartumik aalajangersimannginnerat pillugu isumaqarneq paatsoornerusoq, inatsisartuni suleriaaseq matumani pineqarmat, taanna oqarpoq.
- Sinniisussat katersuunnermi siusinnerpaamik ilanngutsinneqartarput. Taamaammat inatsisartoqarneq eqqarsaatigalugu, ukiamut katersuutilerpata aatsaat sinniisussat ilanngunneqarsinnaapput, Peqqissutsimut Naalakkersuisunngorlaaq oqarpoq.
Sinniisussat massakkut aggersarneqarpata akisuallaassasoq
Taassuma nassuerutigaa, sinniisussat upernaakkut ataatsimiinnerup ulluani kingullermi aggersarneqarsimasinnaagaluartut, ataatsimiinnerulli naalluinnarnerani nalunaaquttap akunnialuinnannguini Nuummukartinneqarnissaat aamma Naalakkersuisunngortut nutaat inissinniarlugit piffissami kingullerpaami isumaqatiginninniartoqarmat isumaqarsimanngilaq, taanna oqaluttuarpoq.
- Tamanna sukkasuumik ingerlasimavoq, sinniisussallu aggersarneqarnissaat akisullunilu ajornakusoorsimassagaluarpoq. Inatsisartunit aalajangerneqarpoq, tamanna ukiakkut ataatsimiinnermi pissasoq, Anna Wangenheim oqarpoq.