juullimut angallanneq
Anorersuup juullisioriarniat ajoquseqqajaavai
Air Greenlandip tunumut timmisartuussinissaa marlunngornermut siuartinneqarpoq
Pingasunngornermiit tunumi anorersuarnissaanik ilimasaarut pissutigalugu Air Greenlandip Nerlerit inaannut Illoqqortoormiunullu timmisartuussinissaa siuartinneqarpoq. Anorersuaq sioqqunneqanngippat meeqqat atuartut Illoqqortoormiuneersut illoqarfimminni juullisiunngitsooratarsinnaapput.
Air Greenlandip Nuummiit Nerlerit inaannut timmisartuussinissaa siuartinneqarpoq marlunngornermi ullaakkut nalunaaqutaq 08.00 pisussanngorlugu. Sineriammi timmisartuussinissanik allannguisoqalaarumaarpoq Nerlerit inaannut Illoqqortoormiunullu ilaasut juullertinnagu apuussinnaaqqullugit.
- Ilaasut Illoqqortoormiuliartut 26-it pineqarput. Taakku ilagaat meeqqat Nuummi 9. aamma 10. klassemi atuartut allallu 16-it Illoqqortoormiuneersut, Air Greenlandip attaveqarnermut pisortaa Pia Christensen Bang nalunaarpoq.