Anthon Geisler toqukkut qimaguppoq
Ilulissani ukiorpassuarni kioskiutilik, Anthon Geisler, sapaatip akunnerata siuliani 102-nik ukioqalertoq, sapaatip ullaani toqukkut qimaguppoq.
Innuttaasunit nuannarineqarluartoq, ukiorpassuarni Ilulissani kioskiutilik, Anthon Geisler, 102-nik ukioqarluni toqukkut qimaguppoq.
Tamanna soraluaanit Hugo Svenssonimit Sermitsiaq.AG-mut uppernarsarneqarpoq.
Ilulissani utoqqaat illuanni Unganartumi Anthon Geisler sapaatip ullaani nalunaaquttap 06.00-ip aamma 07.00-ip akornanni toqukkut qimaguttoq ilisimatitsissutigaa.
- Inuttaata oqaatiginikuuaa sivisuumik nuannersumik inuunikuulluni, aqqusaagarpassuaqarluni. Qasuersaarfissani qilanaaralugu, taavalu toquguni qutsanneqarnissani neriuutiginikuuaa, Hugo Svensson oqarpoq.
Ukiut 60-it sinnerlugit namminersortoq
Anthon Geisler 101-nik ukioqarluni soraarninngorpoq, ukiut 60-it sinnerlugit Ilulissani kioskiuteqareerluni.
Februaarip 21-ani 102-nik ukioqalerpoq, tassani ilaatigut piumasani malillugu Ilulissat mittarfiannut utimullu biiliunneqarluni.
- Nuannaarlunga ulloq atorpara. Uanga inuusunninniik sulineq nuannarisarivara, nuannaarlunga ukiorpassuit sulisimanera eqqaallugit nuannaarlunga atortarpakka, Anthon Geisler inuuissiornerminut atatillugu Sermitsiaq.AG-mut oqarpoq.
Anthon Geisler 100-nik ukioqalerluni sølvimik Nersornaaserneqarpoq.