aliasunneq
Aqagu Nunatsinni erfalasut qiteqqusimassapput
Naalakkersuisut kaammattuutigaat innuttaasut tamarmik pisinnaasullu inuit ulersuarnermit ajunaarnikkut eqqugaasimasut aliasunnerinut misiginneqataaqqullugit
Naalakkersuisut kaammattuutigaat innuttaasut tamarmik pisinnaasullu aqagu inuit ulersuarnermit ajunaarnikkut eqqugaasimasut aliasoqatigineri misiginneqatiginerilu ersersinniarlugu erfalasutik qiteqqutsillugu amoqqullugu.
- Ullumi nal. 16.15 politiinit alianaqisumik kalerrinneqarpunga Nuugaatsiami ulersuartoqarnerata kingunerisaanik inuit sisamat tammaaneqartut maanna ajunaarsimassangatinneqalersimasut, Kim Kielsen (S) tusagassiuutinut taama nalunaaruteqarpoq.
- Taamaasilluni pisut ajornerpaaffianik pisoqarpoq: – tassalu ulersuarneq inuit inuuneranik naleqarmat.
- Naalakkersuisut pisoq alianaqisoq annertuumik eqqorneqaatigaat eqqarsaatitillu ilaqutaasunut eqqugaasunut ingerlateqqillugit.
- Tamassuma ilutigisaanik aammaarlungalu Naalakkersuisut sinnerlugit pisortat inuillu arfininngormat ajunaarnersuaq aallartimmalli annertuumik nalissaqanngitsumillu suleqataasimasut qujassuteqarfigissavakka, Kim Kielsen naggaasiivoq.