Aqqaluaq B. Egede: Pissutsit ilungersunarluinnartuunerat Naalakkersuisut ilisimaaraat
Qilalukkat pillugit pissutsit ilungersunarluinnarnerat Naalakkersuisut ilisimaaraat. Qilalugarniarnerli pissutigalugu nunatta nunarsuup sinneranit isigineqarnera ajornerulersinnaanera pillugu ilisimatuup oqariartuutaa Naalakkersuisup akissuteqarfiginngilaa.
- Tunumi qilalugaqatigiinni pingasuni qilalugaqarnikkut pissutsit ilungersunarluinnartuunerat Naalakkersuisut ilisimaarilluinnarpaat. Taamatuttaaq Tunumi neqinik nutaanik pilersuinissamik pisariaqartitsisoqarnera Naalakkersuisut eqqumaffigisorujussuuaat. Taamaattumi Tunumi tikaagullittassat amerlineqarsimanerat Naalakkersuisut pingaartippaat. Tikaagullittassiissutit ukiumut 12-nit 20-nut qaffanneqarsimapput, tamannalu Tasiilami Ittoqqortoormiinilu atorluarneqalereersimavoq.
Taama Aalisarnermut Piniarnermullu Naalakkersuisoq, Aqqaluaq B. Egede, Inuit Ataqatigiit, Sermitsiami allaaserisamut ”Professori mianersoqqusivoq: Qilalugarniarneq Kalaallit Nunaata tusaamanerlugaassutigilissavaa”-mut Sermitsiamut allaganngorlugu oqaaseqaammi oqarpoq.
Aviisi Sermitsiaq taama allappoq.
Kisianni naalakkersuisup professor Mads Peter Heide-Jørgensenip piniarnermik ingerlatsiinnarnerup tusaamasaalluarnermik annaasaqarneruneranik aamma Kalaallit Nunaata nunata tamalaat akornanni isigineqarneranik annaasaqarneruneranik oqaasii oqaaseqarfiginngilai.
Naalakkersuisut ilaatigut Tunumi qilalukkanik qaqortanik qernertanillu piujuartitsisumik iluaqutiginninnermut siunnersortaat, Nammco, isumaqarpoq, Tunup kujasissuani qilalukkat qernertat nungutaanissamik aarlerinartorsiortitaasut ima ikitsigisut, Naalakkersuisut pisassiissuteqartariaqanngikkaluarlutik. Tamanna naalakkersuisup aamma oqaaseqarfiginngilaa.
Sermitsiap Aqqaluaq B. Egede allaaserisaq tunngavigalugu apeqqarissaarfigiumasimagaluarpaa. Taamaaliorusunngilarli. Taarsiullugu allaganngorlugit oqaaseqaatinik nassiussaqarpoq.
Tassani Aalisarnermut Piniarnermullu Naalakkersuisoq nangilluni allappoq, pisassiissutinik aalajangersaaneq pissasoq nunat tamalaat akornanni isumaqatigiissutit, biologit siunnersuinerat, atuisut ilisimasaat kiisalu Piniarnermut Siunnersuisoqatigiit ilaasortaasa tusarniaavigineqarnerat eqqumaffigalugu. Tamannalu minnerpaamik pissasoq nunat inoqqaavisa pisinnaatitaaffii eqqumaffigalugit. Taassuma ILO Konventionen nr. 169, artikel 13, 14 aamma 15 innersuussutigai.
Aviisimi Sermitsiami atuarnerusinnaavutit. Aviisi uani pissarsiariuk: