Kangerlussuaq
Aqqusinniornissamut pilersaarutit Siumup Maniitsumi ersarissumik paaserusukkaa
Kangerlussuarmut aqqusinniornissamik suliniut, Qeqqata Kommuniani borgmesterip kommunalbestyrelsimut saqqummiussisimannginnera, Siumup immikkoortortaqarfiani aqutsisuisa tupigusuutigaat.
Naalakkersuisunik aningaasaliititsinissaq iluatsissappat, kommuni ukiumut 15 mio. koruuninik ukiuni tulliuttuni 30-ni akiliisinnaassuseqartoq, Qeqqata Kommuniani borgmesterip, Malik Bethelsenip oqaatigisaa, sapaatip akunnerata aallartilaarnerani Sermitsiaq.AG-p allaaseraa.
Aqqusinniortitsinissaq 350 aamma 400 mio. koruuninik akeqassasoq, Malik Berthelsen paasissutissiivoq. Suliniutilli affaa Naalakkersuisunit aningaasaliiffigineqarsinnaanissaa, taassuma neriuutigaa.
Atuaruk: 150 kilometerinik isorartutigisumik aqqusinniornissamik sinnattoq aallartisarneqalertoq
Kommunalbestyrelsimi eqqartorneqarsimanngitsoq
Nalunaarut Siumup Maniitsumi immikkoortortaqarfiani aqutsisuinit tupaallaatigineqarpoq.
- Kommunalbestyrelsi Kangerlussuarmut aqqusinniortitsinissamik aalajangiisoqarsimanngilaq. Taamaammat borgmesteri paasissutissanik taama ittunik tusagassiuutinut saqqummiussinera tupinnartoqartipparput, naak aqqusinniortitsinissaq kommunalbestyrelsimi eqqartorneqaranilu aalajangiiffigineqarsimanngikkaluartoq, Siumup Maniitsumi immikkoortortaqarfiani siulittaasoq, Magssanguaq Qujaukitsoq, allakkanik ammasuni Malik Berthelsenimut allappoq.
Kommunalbestyrelsi avaqqullugu taama nalunaaruteqartarnerit ingerlaannassappatta, kommunalbestyrelsimi suleqatigiinnerup unitsinneqarsinnaaneranik takussutissiisasoq, Magssanguaq Qujaukitsoq allappoq.
- Suleqatigiinnissamut isumaqatigiissummi Oqartussaaqataaneq, Ataatsimoorneq Ineriartornerlu qulequtarineqartut, allakkani ammasuni erseqqissaatigineqarpoq, tassanili suleqatigiinnissamut isumaqatigiissut tunngavingalugu kommunalbestyrelsi piaartumik periarfissanik ujartuissasoq.
Atuaruk: ATV-nut aqqut iluaqutaalluarsinnaavoq
Pilersaarutit ersarissumik paaserusukkai
Aningaasaliiffigineqartussat arlaqartut allakkani ammasumi erseqqissaatigineqarput.
- Ukiuni tulliuttuni aningaasartuutissat annertuumik naleqartut pilersinneqartussallu ilaatigut makku taaneqarsinnaapput: Sisimiuni utoqqaat illuat, meeqqeriviit, eqqakkanut ikuallaavik kiisalu umiarsualivik. Kangaamiuni utoqqaat illuat kiisalu talittarfik. Maniitsumi utoqqaat illuat, familiecenteri kiisalu Atuarfik Kilaaseeraq, Siumup Maniitsumi immikkoortortaqarfia allappoq.
Taamaammat, kommuneqarfimmi innuttaasut akiligassaasa minnerpaaffimmiitinneqarnissaa, Siumut Maniitsumi immikkoortortaqarfiata neriuutigaa
- Aqquserniornissap qularnaatsumik pilersaarusiorfigineqarnera takussutissaqarluartumik inuiaqatigiinnullu aningaasartuutitigut annikinnerpaaffissaanut pilersaarusiorfigineqareerluni aallartisarneqarnissaminut piareerpat tamakkiisumik tapersiinissarput naatsorsuutigineqarsinnaalissaaq, Siumup Maniitsumi immikkoortortaqarfiani siulittaasoq, Magssannguaq Qujaukitsoq oqarpoq.
Atuaruk: Qeqqata Kommunia takornariaqarfinngussaaq