Århus aamma Kujalleq ikinngutigiittut isumaqatigiipput
Århus aamma Kommune Kujalleq isorartussutsimigut Danmarkimiit anginerup akornanni ikinngutigiinnissamik isumaqatigiissusiortoqarpoq.
Kommunit marluk Århus aamma Kujalleq sapaatip akunnerata siuliani ikinngutigiinnissamik isumaqatigiissuteqartut imminnut nallersuunneqarsinnaanngillat assigiinngitsorujussuuppummi.
Kommune Kujalleq 53.000 kvadratkilometeritut isorartutigaaq Danmarkimiillu anginerulluni kisiannili nunatsinni kommunit minnersaraat.
Århus Kommune katillugu 470 kvadratkilometerinik isorartussuseqarpoq. Århus 303.000-nik najugaqarfigineqartoq ikinngutigilikkaminik 8.000 ataallugit innuttalimmit inissisimalluarneruvoq. Kujalliup Århusillu assigiissutaannik ujaasilluaraanni nassaassaqarpoq. Tamarmik ilinniariartortarfiupput - Qaqortumi ilinniarnertunngorniarluni atuarfeqarpoq, niuernermik ilinniarfeqarpoq højskoleqarlunilu kiisalu Kujataanni aamma Danmarkip kitaani illoqarfiit pingaarnersaralugu.
Ikinngutigiinnissamik isumaqatigiissutip ilaagaa illoqarfinni atuartut klassii ukiut tamaasa paarlaasseqatigiinnikkut tikeqaraartinneqartassasut. Atuartunik paarlaaqatigiittoqartarnera 1977-imi aallartippoq, taamani Qaqortoq nammineq kommunitut atorallarmat.
Kommunit aaqqissuuteqqinnerannik ulapputeqarneq pissutigalugu kingullermik kommunimit sulisut ukiut marluk matuma siorna Århusimiipput.
– Sulisutsinnut iluaqqutaasarpoq paasisassarsiortarneq. Kommunit kattussuunnerannik suliaq ulapinnaqaaq, maannali sulisunik paarlaaqateqarneq nukittorsarneqassaaq, borgmester Simon Simonsen oqarpoq, kulturikkut timersornerullu tungaagut Århusimiunik paarlaateqartarnissamik aamma eqqarsaatersuuteqartoq.
Kultereqarnermit Aka Høegh Qaqortumiit Sculpture by the Sea-udstillingen (Saqqummersitsineq: Qiperugaq immap sinaani aaq.) peqataavoq, soorlu århusermiut Tall Ship Race 2007 ingerlanneqarmat kalaallit eqqumiitsuliaanik akiliikkusersuinerannillu malinnaasinnaasimasut.
Ikinngutigiinnermik isumaqatigiissutip aningaasanik amerlasuunik atuiffiunissaa ilimagineqanngillaq. Isumaqatigiissutaavoq illoqarfiit namminneq angalanermut aningaasartuutit Kalaallit Nunaat/Danmark akilertassagaat tikeraarfigineqartullu inissaq isumagisassagaat.