Danmark
Arnat atugarliortut pinartoqartillugu inissaanik siunnersuuteqartut
Kalaallit arnat Danmarkimiittut atugarliortut ikiorniarlugit, Inuuniarnikkut Atugarliortunut Siunnersuisoqatigiit iliuuseqarfissanik tallimanik tikkuaapput
Danmarkimi kalaallinut arnanut inuuniarnermikkut ajornartorsiortunut, nukersorfiusumi aamma atornerluisumik aappariittunut pinartumik inissanik utaqqiisaasunik pilersitsisoqassaaq.
Inuuniarnikkut Atugarliortunut Siunnersuisoqatigiit siunnersuutaasa tallimaasut ilaat taama nipeqarpoq.
Kajumissaarutit siunnersuisoqatigiit nalunaarusiaanni, ataasinngormat saqqummiunneqartumi atuarneqarsinnaapput.
Atuaruk: Kalaallit arnat atugarliortut inuiaqatigiit naqqanut pisarput
Nammineq misissuineq
Siunnersuisoqatigiit nammineq kalaallit arnat atugarliortut misissuiffiginerannit, aamma tamanna pillugu martsimi ataatsimiinnermit kajumissaarutit aallaaveqarput. Tamatuma saniatigut maanna iliuusissatut pilersaarut, kalaallit Danmarkimiittut iliuuseqarfiginissaannut tunngatillugu 2016-ip naanerani qaangiuttussaavoq.
Kommunit pitsaanerusumik iliuuseqassasut
Siunnersuisoqatigiit aamma siunnersuutigaat, atornerluinermut tunngatillugu kiisalu persuttaanerup aamma kinguuaassiutitigut atornerluinerit kingunerlutsinneqarnerinut, kommunit immikkut ittunik neqerooruteqarnissaannut pisussaaffilerneqassasut.
Assingusumik aamma siunnersuutigineqarpoq, kalaallit atugarliortut nutserunneqartarinissaannut aamma danskit systemiannut kommunit neqerooruteqarnissaminnut pitsanngortariaqartut.
Iliuusissaq nutaaq
Siunnersuisoqatigiit aamma siunnersuutigaa, Social- og Indenrigsministeria qanoq ililluni, kalaallit atugarliortut sukkasuumik Danmarkimi adresseqalernissaannik aamma angerlarsimaffeqanngitsunngunnginnissaannut siunnersuuteqassasoq.
Kiisalu aamma siunnersuutigineqarpoq, kalaallinut Danmarkimi atugarliortunut iliuusissatut pilersaarummut aningaasanik immikkoortitsisoqassasoq.
Atuaruk_ 'Kalaallit Nunaanni danskisut isigineqarpunga Danmarkimilu kalaaliinnaallunga'