Asii Sara pillugu: Nunatsinnut alianartoq
Sara Olsvigip politikkimit tunuarnera Kalaallit Nunaannut alianartuusoq, kommuninut qinersinermi taaguunneqarluartup aamma iloqarfiit pingaarnersaanni borgmesterip nuimasup IA-meersup, Asii Chemnitz Narupip oqaatigaa.
Nunatsinni partiit annersaasa tulliani siulittaasutut tunuarniarluni aalajangerneq, Sara Olsvigip ataasinngornarmi tusagassiortunik katersortitsinermi paasissutissiissutigisaa, kommunimi IA-meersumit misilittagartuumit Asii Chemnitz Narupimit upputigineqarpoq.
- Pissaanermik atuinera torersuuvoq, Asii Chemnitz Narup oqarpoq.
Eqqarsaatissiissut
- Arnat politikkimit tunuartarnerannut tamanna eqqarsaatissiivoq. Politikkikkut ingerlatsinermi nipip aamma aqutsinerup torinngitsup arnat qimaatippaat, Asii Chemnitz Narup oqarpoq, Inatsisartunut siulittaasup Vivian Motzfeldtip sammisaq qaqissimammagu taassuma nuannaarutigaa.
- Taassuma iliuusissaa pissangallunga utaqqivara, borgmesteri Nuummeersoq oqarpoq.
Piukkunnanngitsumik aqutsineq
- Nuna politikkikkut patajaanngitsumik ingerlavoq, naalakkersuisut kisissaanngitsuimik taarserarneqartarput. Nuna piukkunnanngilluinnartumik aqutsiffiuvoq, Asii Chemnitz Narup naqissusiivoq, taanna aalajangiusimarpalulluni partiimi siulittaasutut qinigassanngortinniarani oqarpoq.
- Sulinera aamma piginnaasakka kommunimi atorniarlugit, tamanut oqaatigisinnaavara. Misilittagarilersimasama kommunimi pitsaanerusumik ingerlatsinermut periarfissaqarnerunera ajorisassaanngilaq, IA-mi politikeri oqarpoq.
Piukkunnartumik taasaqanngitsoq
Asii Chemnitz Narup siulittaasussatut piukkunnartumik taasaqarnianngilaq.
- Nuna tamakkerlugu ataatsimiinnissap tungaanut piffissaqarluarfigalugu eqqarsaatigilluagassaavoq, borgmesteri oqarpoq.
IA-p Kim Kielsen naalakkersuisoqatigisimaneranik oqarfigineqarluni aperineqarami, nunatsinni politikkikkut ingerlatsinermi piukkunnanngitsumik ingerlanermik isornartorsiuinini itisilerpaa.
- Sivisunngitsumik tassani naalakkersuisoqatigiippugut. Malunnaatilimmillu allannguinissamut periarfissaqanngilluinnarluta, taassuma ukiup aappaa avillugu Partii Naleqqamik aamma Siumimik naalakkersuisoqateqarsimanertik pillugu oqarpoq.