pilluaritsi
Assit: Nunaqarfimmi atuarfik nersornaaserneqartoq
Niaqornaarsunni meeqqat atuarfiat Kalaallit Nunaanni Brugsenip ukiumoortumik nersoornaat tunniuttagaanik pissarsitinneqarpoq
Niaqornaarsunni innuttaasut arfininngormat nuannaarutissaannik tunineqarput.
Atuarfik Kristian Lundblad inuiaqatigiinnut maligassiuilluarnerat pissutigalugu Kalaallit Nunaanni Brugsenimit nersornaaserneqarpoq.
- Tulluusimaarutissaqarpusi. Inuiaqatigiinnut sunniuteqarluartumik iliuuseqarpusi tamannalu tanngassimaarutigisariaqarparsi. Meeqqanik peqqissunik ileqqorissaartunillu pilersitseqataavusi. Atuarfik Kristian Lundbladip pingaartitaasa ilagivaat meeqqat timikkut tarnikkullu peqqissut. Ullut tamaasa timip peqqissuutinnissaa pingaartinneqartarpoq, Kalaallit Nunaanni Brugsenip siulittaasua Ib Lennert Olsen Hotel Hans Egedemi nersornaammik tunniussinermi oqarpoq.
Atuarfimmi meeqqat atuartut timikkut tarnikkullu peqqissuunissaat anguniarneqartarnera Ib Lennert Olsenimit nersualaarneqarpoq. Atuarfimmi 'timi peqqissuunerlu' ullut tamaasa atuarnermut ilaatinneqartarpoq. Aamma atuarfimmi aqutsisut anguniartarpaat atuartuutitik qaffasinnerusunut atuarnissaat, soorlu maannakkut atuartuutigineqarsimasut sisamat Danmarkimi efterskolertut.
- Atuarfik annertuumik atuartunut iluaqutaasussamik iliuuseqarput. Atuartut nukittuut peqqissullu pinngortinneqarput. Meeqqat imminut tatigisut pilersippasi. Atuartut sakkussaannik tuniorarpasi – siunissamimi tamatta unammilligassanik aqqusaagaqartussaavugut qularnanngitsumillu sakkussat ilikkakkatik atorluarumaarpaat, Ib Lennert Olsen oqarpoq.
Assit ataani takukkit