qinersineq
Assit: Partii Naleraq atuarfimmi qineqqusaartitsinermi taaguunneqarnerpaasoq
Kalaallit Nunaata aningaasaqarnera pillugu ilaatigut Inatsisartunut qinersinissamut qinigassanngortittut Sisimiuni GUX-imi atuartunit apeqquteqarfigineqarput
Sisimiuni Sanaartornermik Ilinniarfimmi qineqqusaartitsinermi GUX-imi atuartut aqutsisuupput.
'Kalaallit Nunaata ukiuni aggersuni aningaasaqarnikkut unammilligassai' oqallinnermi qulequtarineqarpoq. Sanaartornermi ilinniarfimmi ilinniarfiupput GUX, Aatsitassalerineq, Sanaartornermik ilinniarfik kiisalu Issittumi Ingeniørinngorniarfik.
Partiit tamarmik arfinillit qineqqusaartitsinermi peqataapput. Atuartut 200-t missaanniittut atuarfimmi sulisullu aamma peqataallutik.
Oqallinneq uummaarissumik ingerlanneqarpoq, nalunaaqutaq 10.00-mit 11.45-p tungaanut oqallitsinneqarlutik. Atuartut apeqqutaat aaqqissuisunit atuarneqartarput - qineqqusaartullu oqaatsit namminneq atorumasaat atorneqarlutik.
Aaqqissuisut qineqqusaartitsilinnginnermi piareersarluarsimapput, ilaatigut Sulitsisut Peqatigiiffianni pisortaq Brian Buus Pedersen aamma økonomi Tønnes Berthelsen Kalaallit Nunaata aningaasaqarnera pillugu paasisaqaqqaarsimallutik:
- Politikkikkut aaqqissuusseqqittoqanngippat aningaasaqarnerput ajutooriaannaavoq. Aamma aningaasarsiorfiusinnaasunik nutaanik ujartuisoqartariaqarpoq, Brian Buus Pedersen aamma Tønnes Berthelsen ilaatigut ilinniartunut oqarput.
- Ilisimatuut oqaatigisartagaat eqqortuupput. Ilisimatuut oqaatigisartagaannut piffissanngorpoq tusarnaarnerusalernissaaq, Anda Uldum oqarpoq. Siumumit Martha Lund Olsen ima oqarpoq:
- Partiit siammasissumik politikkikkut aaqqissuusseqqittariaqalerput kiisalu aningaasarsiorfiusinnaasunik nutaanik nassaartoqartariaqalerpoq.
Inuit Ataqatigiinnit Sara Olsvig ima oqarpoq:
- Siammasissumik politikkikkut aaqqissuusseqqittoqartariaqarpoq, Siumut aamma Inuit Ataqatigiit tamanna kisiartaallutik isumaqatigiissutigissanngilaat.
Partii Naleraq taaguunneqarnerpaasoq
Ataatsimeeqatigiittoqareernera kingorna qinersisitsisoqarpoq. Tassani Partii Naleraq 63-nit qinersisunit 35 procentinit taaneqarpoq.
Atuarfimmi qinersineq:
- Partii Naleraq: 22-nit qinerneqarpoq - 35 procent
- IA: 14-nit qinerneqarpoq - 22 procent
- Atassut: 12-nit qinerneqarpoq - 19 procent
- Demokraterne: 7-nit qinerneqarpoq - 11 procent
- Siumut: 6-nnit qinerneqarpoq - 10 procent
- Partii Inuit: marlunnit qinerneqarpoq - 3 procent
Qinersisut katillugit: 63 - 100 procent
Assit ataani takukkit