ukiunik 40-nngortorsiortut
Assit: Sikokkut aliannaarluavipput
Rock’n roll-mik nipilersortartut Siko Ilulissaneersut naapeqqillutik tusarnaartitsigamik nuannarisaaqaat
Erinarsoqataasoqarpoq, qittattoqarluni ilaatigullu qullipittoqarluni arfininngormat Sikokkut Ilulissani kulturip illorsuani Sermermiuni tusarnaartitsimmata.
Inuit 250-it missaat billetisisimapput nipilersoqatigiit ukiunik 40-nngortorsiorlutik tusarnaartitsinerannut. Ukiut ingerlaneranni Sikokkut apersortittuni, qitittuni aammalu imerniartarfimmi Hotel Jakobshavnimi nipilersortuusarsimapput.
- Amerlapput erinarsoqataallutillu qittattut aammalu ilaat qullilisarlutik, Sermermiuni teknikeri Jonas Fleischer oqaluttuarpoq.
Arfininngormat unnukkut tusarnaartitsineq qulinut aallartippoq unnuakkullu marlup qeqqa unilluni. Tusarnaariat nipilersoqatigiitoqqat unequnngikkaluarpaat. Ilimanarluinnarpoq Sikokkut tusarnaartitseqqikkumaartut naak ilaasortat illoqarfinnut arlalinnut avissaarsimagaluartut.