Illoqarfimmiut nuannannerat
Assit: Sisimiuni nuannanneq iluatsilluarpoq
Arfininngornermi Sisimiuni anorlerlunilu qiianaraluartoq inuit 3.000-it missaat illoqarfimmiut nuannatsinneqarneranni peqataapput
Nunani allani nuannaariartarfinni nuannarisaaqisut water balls aamma Sisimiunut anngupput. Sisimiuni kulturip illuata silataani arfininngornermi illoqarfimmiut nuannatsinneqarneranni aliikkutassiat taakku nuannarisaalluartut ilagaat.
- Water balls-inut siuleriiaarluni utaqqisoqartuarpoq. Taamaammat ilimagaara meeqqat assut nuannarisimassagaat, Sisimiuni illoqarfimmiut nuannatsinneqarneranni komite sinnerlugu Jens Klaus Lennert oqarpoq.
Imermik immiisinnarluni plastikimik ballonit iluannut meeqqat isertinneqartarput tassanilu paasisarpaat water ballip iluani nikorfaniarneq ajornaatsuinnaanngitsoq.
Sammisassat allarpassuit aamma ilagaat pissittaartarfik, kavittarfik kiisalu inersimasut meeqqat pølsevognimi barimilu tumannguersaasersinnaasarlutik.
- Sila anorsaarlunilu qiianaraluarpoq. Kisianni taamaakkaluartoq inuppassuit takkussorput. Ilimagaara ullup qeqqaniit unnuap qeqqata tungaanut nuannannermi inuit 3.000-it missaat takusaasimassasut, Jens Klaus Lennert oqarpoq.
Aliikkusiarfimmi atortut Sisimiuni Lions Clubip pigisarai. Ukioq 2002 aallarnerfigalugu Sisimiormiut umiarsualivimmi illoqarfimmilu nuannatsinneqartarput.