Inuusuk festival
Assit takukkit: Inuusuk Festival nuannerluinnartumik naggaserneqarpoq
Inuusuttut festivaliat Inuusuk nipilersortartunit tallimanit piareersarluarsimasunit sisamanngornermi naggarserneqarpoq
- Attortisimaqaanga oqaasissaaleqalungalu, taama NUIF-imi inuusuttut festivalianni Inuusummi naggataarusumik tusarnaartitsineq ippassaq ingerlanneqartoq oqaaseqarfigisinnaavara. Festivalimik aaqqissuisoq Angajo Lennert-Sandgreen inuusuttut nipilersortartullu festivalimut ulluni tallimani tapersersuinerannut attortissimaqisoq oqarpoq.
Inuit NUIF-ip silataani ippassaq matut ammannginneranni nipilersorlutillu misiliisut suli naanngitsut aggialerput.
Unnuk Hans-Peter N. Bayip Inunnguaq Petrussenimik peqateqarluni guitarerluni tusarnaartitsineranik aallarnerneqarpoq. Tassanilu aamma saqqummersinneqaqqippoq sooq Hans-Peter taagorneqalersimanersoq: ‘Angut erinalerujussuaq’. Tusarnersunik appisimaarnermi saniatigut tusarnaartut nuannareqisaannik nipilersukkanik allat sanaavinik tusaamasanik atuivoq.
Tamatuma kingorna Nuutit appipput, tusarnaartullu qiimmatsinnerulaarlugit. Pilu Noahsen aamma Nathan Kreutzmann erinarsoqataapput, tusarnaariallu erinaq siullermiit aamma igiuipput. Qarsoq taakku tulleralugit appippoq tusarnaariat qiimmaallaatigeqisaannik. Nipilersukkat nuannarineqartut soorlu ‘Nuuk qulaallugu’ aamma ‘Aqqut takivoq’ nuannarineqaqisumik atorpaat.
Qilaatersortoq rockertullu
Qilaatersortartoq David Manumina Qaanaameersoq tamatuma kingorna tusarnaarianut qilaatersorpoq. Aammali pissutsit allanngortinneqariasaarput Zikaza appimmat, kikkullu tamarmik qittatilermata. Taakkua appisimaarneranni NUIF-imi inunnik 400 missaanik ulikkaarluni inoqarpoq.
Naggataatigullu minnerunngitsumillu Small Time Giants naggataarutaasumik appisimaarput nipilersukkaminnik nutaanik pisoqqanillu. Inuit pissittaarput, nilliapput qissallutillu. Aallaqqaasiutigalugulu inuit nipaallisimatippaat, tamatumalu kingorna qiimmassarlugit.
- Qiiaamminaannarpoq. Inuit tamarmik nuannapput, naggataarnersiornerlu naammat inuit aniumanngikkaluarput, tassali appisimaartunit kingullernit nuannisartinneqangaaramik, Angajo Lennert-Sandgreen attortissimaqisoq oqarpoq.
- Peqataasut ukiui tamarmik assigiinngillat. Utoqqaat inuusuttullu. NUIF-imit peqataasunut tamanut qujavugut, kiisalu nammineq piumassutsiminnik aamma ikiuuttunut nipilersortunullu tamanut akeqanngitsumik appisimaartunut. Kiisalu aamma minnerunngitsumik NAPA-mut qujavugut. Taamami ikiorneqartiginngikkaluarutta una pisoq iluatsissimanavianngikkaluarmat. Kiisalu naggataagut minnerunngitsumik inuusuttunut ullut tamaasa NUIF-imukartartunut qujarusuppugut, NUIF-llu taakkua sinnattuisa piviusunngornissaannut ikiuutaassaaq. Maannamut qujavugut, tullianillu festivaleqarnissaq qilanaarilereerparput.
NUIF-ip facebookimi quppernerani Inuusuk Festivalimit assit videoliallu takusinnaavatit.
Assit allaaserisap ataani takukkit