Assit takukkit: Miseqqamit kajortitamit namminersorlutik oqartussanut

Kalaallit Nunaat sumut ingerlava? Taanna qulequtaavoq Alea Hammondip saqqummiussinerani, ualikkut eqqissisimasumik kaffisoqatigiilluni ataatsimiititsinermini, tassanilu takkuttorpassuit Naalakkersuisut siulittaasuannut Aleqa Hammondimut apeqquteqarsinnaapput.
Aleqa Hammond siullermeersumik Nordatlantisk Hus-imiippoq. Tassunga aqqusaarluni pulaarpoq Savalimmiuni Naalagaaffeqatigiit ataatsimiinneranni peqataajartornermini.
– Nunani tamalaani oqallinnermi atlantikup avannaamiuisa nipaat saqqumilaaleraluttuinnarput. Ineriartorneq tupinnaannartoq atorparput, uagut Kalaallit Nunaanni allanngornerujussuit isummerfigiuartussaallutigit. Kalaallit Nunaanni qanoq iliornersugut nunani tamalaani soqutigineqartorujussuuvoq. Soorunami silap pissusiata allanngoriartorneranut atatillugu, tamannami Kalaallit Nunaanni malunnarnerujussuummat, Aleqa Hammond aallarniivoq, tamatumalu kingorna erseqqissarlugu namminersornerullutik oqartussaqarnerup eqqunneqarnera nalissaqanngitsusimasoq.
Aatsitassanut inatsit, suliffissaaleqinerujussuaq, suliniutinut angisuunut inatsit, akissarsialutsitsinissamut naaggaarneq ineriartornerlu sukkasooq Aleqa Hammondip saqqummiussinermini tikippai.

Apeqqarissaarput
Amerlasuut oqaaseqarusupput, Naalakkersuisullu siulittaasuannut apersuterpassuaqarlunilu kissaaterpassuaqarpoq. Ilaatigut inuusuttunut, ilinniagaqarnermik kingorna Kalaallit Nunaannut utertunut, atugassarisat pilerinarnerusut ujartorneqarput. Puisit amerpassui Kalaallit Nunaanni toqqortaatigineqartut qanoq pineqassappat? Inuppassuit, ilaat qitornallit inissaqaratik suliffissaqaratillu Kalaallit Nunaannit Danmarkimut nuuttartut. Kalaallinut inuusuttunut Danmarkimi najugaqartunut Kalaallit Nunaanni ilinniagaqarfinnut iserniarnermi akornutissat. Ilinniagaqarfiit naatsut akunnattumillu sivisussusillit sammineqarnerunissaat. Timmisartumi billetsit akisuut aammalu Danmarkimi kalaallit peqatigiiiffiinut tapiissutit ikilisinneqarnerat, tassa ilaatigut tamakkua Aleqa Hammondimut eqeersimaartumut apeqqutigineqarput.

Miseraq kajortitaq tusaamasaq
Aperisut ilaasa mianersortunnguamik Aleqa Hammondip miseqqiaata kajortitap tusaamasanngorsimasup sananissaanut ilitsersuutaa apeqqutigaa. Taamaasilluni miseqqap eqqortumik ataqatigiiffia saqqummiunneqarpoq.
– Ilaanni apersorneqarlunga oqaluttuarpunga kajortitamik miseqqiornermi nunarsuarmi pissartaallunga. Tassa taamatut allattoqarpoq. Eqqortumilli ataqatigiissillugu oqaluttuarpunga atuartuullunga kajortitamik miseqqiorneq qallunaallu nerisassiaannik allanik nerisassiorneq ilikkarsimallugu. Ajoraluartumik assersuutigalugu qulluukkanik sananeq ilikkarsimanngilara. Ersaartaattoqarluarpoq Aleqa Hammond oqarmat miseraq kajortitaq ajoquteqanngitsoq, Nunatsinnili aamma naleqqutissasoq qulluukkiornerup ilinnialaarnissaa.

Namminersorneq
Nunat tamarmik namminneq unammilligassaqarput qanorluunniit aqutseriaaseqaraluarunik, Aleqa Hammondilu naggataatigut oqaluttuarpoq namminerminut pisoq annertuujussasoq siunissami Inuiattut Nalliuttorsiornerit ilaanni Kalaallit Nunaata namminersortunngornera suaarutigineqartuuppat.
Peqataasut Nordatlantisk Hus-imit anisut ilaat Sermitsiaq.AG-mut oqarput ualeq imaqarluartuusimasoq.