ilisimatusarneq
Assit takukkit: Umimmaat uumasorsiuunik tupaallatsitsisut
Umimmaat taama ingerlaartigisarnerat, ilisimatuutut suliniummi uumasorsiuut tupaallaatigaat.
Umimmaat qulit ullumikkut gps-imik atortulimmik ujameqartinneqarput, taakku paasissutissanik ilisimatuunut Københavmimiittunut nassiussuisarput, uumasullu ukiup ataatsip ingerlanerani 800-miit 1000 kilometerimut uumasut taakku ingerlaartartut paasinarsivoq. Tamanna gps-imik atortulerneqarfimminnit radiusi 40 kilometerit iluani pisarpoq.
Ulloq unnuarlu ingerlaartut
- Aasaanerani nalunaaquttap akunnerini 24-ni ingerlaarujoortuaannangajapput, kisianni aamma ukiukkut ingerlasaqaat, uumasorsiooq Mikkel Stelsvig, Københavnimi Zoologisk Havemeersoq nassuiaavoq.
Taanna Ittoqqortoormiit eqqaannut ilisimassassarsioriartornissamut nutaamut ilisimatuut tallimat allat peqatigalugit atortunik piareersaleruttorput. Umimmaat 17-it gps-inik atortulersornissaat suliassarissavaat.
- Ingerlaarujoortuaannangajapput. Sukkassusaalli annertunngilaq, kisianni ullup ilarujussua aalanermut atortarpaat. Naasoqarpianngitsumi neriniarniarlutik aalarusaaginnariaqartarpasipput, Mikkel Stelvig nassuiaavoq, ilanngullugu oqarpoq:
Nerisatik pisariaqartiinnavittaraat
- Umimmak tamugartortuuvoq naasunillu pitsaasunik nerukkarluarnissamik pisariaqartitsivoq. Umimmak ukiaq naallugu nerinngikkuni, orsuminilu sillimatini atuinnaraluarunigit nerukkat naatitsiniarnerminik unittuussapput aallarteqqitassaarpiarunnaarlutillu.
Umimmaat ingerlaarfiinik aamma naasoqarnermut sunniutaat pillugit ilisimatuut ilisimasaat, silap pissusiata kingunerisinnaasaanik ilaanik pisuusaartitsinermut atorneqassapput.
- Umimmaat ukiukkut qanoq uumaniartarnersut paasisaqarfiginerunerisa saniatigut, nunami allanngutsaaliukkami pisuussutit qanoq aqulluarsinnaanerinut paasissutissanik pissarsiffigisinnaavagut, tassanilu umimmak pingaarutilittut inissisimavoq, Mikkel Stelvig, ilisimasassarsiorneq pillugu nassuiaavoq.
Ataasinngorpat tikissasut
Ilisimatuut – pingasut Aarhus Universitetimeersut pingasullu Zoologisk Havemeersut – septembarip 25-anni Kangerlussuarmut ilisimasassarsioriartornertik aallartissavaat, taakkulu Frimodt-Heineke Fondenimit taperserneqarput.
Siorna ilisimasassarsiornermi assit uani takukkit: