Ataatsimiititaliaq coronap aningaasaqarnermut sunniutissai pillugit periusissiamik suliaqaqqusivoq
Inatsisartut Aningaasaqarnermut Akileraartarnermullu Ataatsimiititaliaata coronap inuiaqatigiit aningaasaqarnerannut sunniutissai pillugit periusissiamik ukiunut arlalinnut atuuttussamik suliaqartoqarnissaa ujartorpaa.
Ataatsimiititaliap Naalakkersuisut ikiorsiissutinik maannamut suliaqarsimanerat naammagisimaarpaa. Tassunga ilanngullu takornariartitsinermik inuussutissarsiuteqartunut ingerlatassat, sapaatip akunnerani matumani saqqummiunneqartut.
Ataatsimiititaliamilli ujartorneqarpoq, coronap Kalaallit Nunaanni aningaasaqarnermut sunniutissaasa isumagineqarsinnaanerannut, ukiunut arlalinnut atuuttussamik periusissiortoqarnissaa. Ataatsimiititaliaq sapaatiummat ualikkut tusagassiorfinnut nalunaaruteqarnermi allappoq.
- Ataatsimiititaliap isumaa malillugu qanittumut isigaluni manna tikillugu iluuserineqartut
saniatigut ungasissumut isiginerulluni aaqqiissuteqarnissaq aamma piariaqartinneqassaq.
-Tassami Verdensbanki malillugu aningaasaqarnikkut ajornartorsiornerit
ukiuni 150-ini kingullerni ajornersariligassaannut sillimasariaqarpugut, ataatsimiititaliaq allappoq.
Ataatsimiititaliap suliassat arlallit ilanngullugit taakkartorpai, ataatsimiititaliap taamatut periusissiornermi taakku ilanngunneqarnissaat eqqarsaatigineqartariaqarsorigamiuk.
Ataatsimiitialiamit ilaatigut uku oqaatigineqarput:
ikiorsiissutit suliffeqarfinnik imminut akilersinnaanngitsunik napatitsiniarnermut
peqataaqataannginnissaat qulakkeerneqartariaqartoq.
aalisarnerup ineriartornera nakkutigineqassasoq, avammut niuerutigisartakkat annersarimmassuk.
coronap ajornartoortitsinera suliffeqarfinnut namminersortunit pigineqartunut
taamaallaat eqquinngitsoq, aammali ingerlatseqatigiiffinnut suliffeqarfinnullu
namminersortitanut Namminersorlutik Oqartussanit pigineqartunut.
coronap ajornartoortitsinerata najukkanut mikinernut sunniutai immikkut eqqumaffigineqartariaqartut.