Ataatsimiititaliaq DK-mut aallarpoq: Uumissuilluni pinerluuteqartarnerit akissarsiallu oqallisiginiarpaat

Inatsisartut Inatsisinut Ataatsimiititaliaata ulluni makkunani Folketingimut tikeraarnerani oqaluuserisassaqarluartoqarpoq, tassani politikerit Nunarput pillugu ataatsimiititaliaq aamma Inatsisinut Ataatsimiititaliaq ataatsimeeqatigiumavaat.

Ilaatigut Inatsisinut Ataatsimiititaliap pinerluttulerinermi inatsisip allanngorneqarnissaa oqaloqatigiissutigerusuppaa, taamaalilluni inatsimmi uumissuilluni pinerluttarnerit ilanngunneqarniassammata.

Inatsisinut Ataatsimiititaliaq angalanissaq sioqqullugu Folketingimi ataatsimiititalianut allagaqarnermini taama allappoq.

Pinerluttulerinermi inatsimmi pinerlineqartup suminngaanneernera, suiaassusaa pillugu imaluunniit allat pissutigalugit nakuusertarnerit, sioorasaarinerit assingusulluunniit immikkut pineqaatissiissutigineqarneq ajortut imaluunniit sakkortusaataaneq, Nunatsinni Inuit Pisinnaatitaaffii pillugit Siunnersuisoqatigiit aamma Danmarkimi Inuit Pisinnaatitaaffii pillugit Siunnersuisoqatigiit oqariartuutiginikuugaat, politikerit allagaqarput.

Akissarsiat paasiuminaatsut

- Pinerluttulerinermi inatsisip allanngorneqarnissaa naapertuunnersoq Kalaallit Nunaanni Eqqartuussiviit pillugit Siunnersuisoqatigiit isumaliuteqassasut, nalunaarusiami inassutigineqarpoq, taamaalilluni uumissuilluni pinerluuteqartarnerit pineqaatissiinerit aalajangiiffigineqarnerini sakkortusaataalersillugit, Inatsisinut Ataatsimiititaliaq allappoq.

Pinerluttulerinermi inatsisip allanngorneqarsinnaanerata saniatigut Kalaallit Nunaanni naalagaaffiup politiivisa aamma pinerluttunut inissiisarfinni nakkutilliisut akissarsiaat pillugit ataatsimiititaliaq oqaloqatiginnikkusuppoq.

Nunatsinni politiit pinerluttunullu inissiisarfinni nakkutilliisut akissarsiaqarnerulersinniarlugit 2020-mi 38 millionit koruuninik aningaasaliisoqarpoq, taamaalilluni akissarsiaat Danmarkimi suleqataannut naapertuutilissammata. Akissarsiat qaffanneqarnerat aaqqiissutaannaagallarpoq, atorunnaassaarli:

- Piffissaritinneqartoq qaangiuppat ass. politiit pinerluttunullu inissiisarfinni nakkutilliisut akissarsiaat qanoq ikkumaarnersut paasiuminaappoq, Inatsisinut Ataatsimiititaliaq allakkami allappoq.

Isumaqatigiissitsiniarneq aamma digitalinngorsaaneq

Kalaallit Nunaanni Politiit peqatigiiffianni siulittaasoq, Bjørn Bjerregaard, akissarsiat pillugit naalagaaffimmut isumaqatiginninniarneq unittoorsimasoq qanittukkut Sermitsiaq.AG-mut ilisimatitsivoq, aamma aaqqiissutaagallartumut tapiissuteqarnermut nutaamut taarsiullugu isumaqatigiissummik atuuttuartussamik piumasaqartoqarpoq.

Kalaallit pinerluttunut inissiisarfiini isertitsisarfiinilu pissutsit pillugit ataatsimut paasissutissanik amigaateqartoqarnera pillugu Folketingimi ataatsimiinnermi Inatsisinut Ataatsimiititaliap oqaloqatigiissutigerusuppaa, taakkumi danskit akisussaaffigaat.

Aaqqiagiinnginnermi isumaqatigiissitsiniartarneq pillugu misiliutaasumik aaqqiissut aamma Kalaallit Nunaanni Eqqartuussiviit digitalinngorsarneqarnerisa killiffia, kiisalu biilinik ingerlatsinermut allagartat pillugit ajornartorsiutit aamma oqallisigineqassapput.