Ataatsimiititaliaq Naalakkersuisunut: Inuusuttunut nassuiaanissarsi amigaatigaarsi
Illersornissaqarfiup iluani ilinniagaqarusunnermi ilinnialernissamulluunniit misilitsinnermi inuusuttut erseqqissumik Naalakkersuisuniit suli nassuaaffigineqanngillat. Nunanut Allanut Sillimaniarnermullu Ataatsimiititaliaq Naalakkersuisut akisussaasuusut marluk maanna oqaloqatigereersimalerpaat annertunerusumillu paasisaqalersimallutik.
Illersornissaqarfimmi ilinniarnissamut misilitsinnissamut inuusuttut tapiiffigineqarsinnaanersut imaluunniit Namminersorlutik Oqartussaniit ilinniagaqarnermi tapisisinnaanersut aasap ingerlanerani paatsuungatigineqarput.
Inuusuttut sakkutuujusussaanermi misilitsinniarunik Namminersorlutik oqartussaniit tapiiffigineqarsinnaasut, Nunanut allanut Naalakkersuisup Pele Brobergip paragraf 37 naapertorlugu apeqquteqartoqarnerani akissuteqarpoq, killormullu Ilinniartitaanermut Naalakkersuisup Peter Olsenip misilitsinnerit ilinniarnermut attuumassuteqannginnerarpai angalanernilu tapiissuteqartoqarneq ajortoq akissutigalugu.
Ataatsimiititaliaq paasisimasaqarnerulerpoq inuusuttuunngitsulli
Manna Nunanut Allanut Sillimaniarnermullu ataatsimiititaliap Nunanut Allanut Naalakkersuisoq, Pele Broberg aamma Ilinniartitaanermut Naalakkersuisoq, Peter Olsen ataatsimeeqatigereersimavai. Oqaloqatigiinermi sooq paragraf 37 naapertorlugu assigiinngitsunik oqariartuuteqartoqarnersoq oqaloqatigiissutigineqarpoq.
Naalakkersuisut assigiinngitsunik oqartuuteqartarnerat pillugu ataatsimiititaliaq paasisaqalersimavoq inuusuttullu pisortatigoortumik nassuaaffigineqartariaqartut ataatsimiititaliaq isumaqarpoq.
- Suliaq pillugu Ataatsimiititaliap Naalakkersuisullu taaneqartut marluk akornanni paaseqatigiinneq ersarinnerulersorinarpoq. Taamaattoq suliami uani pingaarnerpaatut inissisimasut - tassalu inuusuttut - eqqarsaatigalugit ersarissaanissaq amigaataavoq, ataatsimiititaliami siulittaasoq Sofia Geisler oqarpoq, nangillunilu:
- Tamanna tunngavigalugu Ataatsimiititaliap Naalakkersuisut pineqartut marluk kaammattorpai tamanit atuarneqarsinnaasumik inuusuttunut nassuiaasseqqullugit Illersornissaqarfimmi ilinniarnissaminnut periarfissaat suunersut, inuusuttut taakku ilinniartuunersiuteqarnermut inatsimmi periarfissaat suunersut, tamatumunngalu ilanngullugu sakkutuujusussaatitaanermut atatillugu misilitsinneq qanoq kalluarneqarnersoq - Naalakkersuisut tungaanniit inuusuttunut tamanna tunniunneqartariaqartoq Ataatsimiititaliaq isumaqarmat.