avissaartuunneq
Atassutip ataatsimeersuarnerani eqqissiviilliortoqartoq
Steen Lynge oqaaseqarsinnaannginnami Atassutip ataatsimeersuarneranit ingerlaannarpoq
Manna pitsaavallaanngilaq. Partiitut sunnguamilluunniit aqutsisinnaanngitsutut saqqummiunneqartussanngorpugut, angut 50-it sinnerlugit ukiulik oqarpoq matuminngalu allattumut qissimilluni.
Ulloq tassaavoq sapaat februaarip 19-ia 2017 sumiiffilu tassaalluni Nuummi Ukaliusap Atuarfiata eqaarsaartarfia, Atassutip ataatsimeersuarfigisaa. Nalunaaqutaq aqqaninngulerpoq. Politikeri nuannarineqarluartoq Inatsisartunullu ilaasortaasimasoq, Steen Lynge Nuummeersoq, ataatsimiinnermi oqaatsit sakkortuut atorlugit oqaaseqarumasimagaluarpoq, aqutsisulli Mette Sofie Jørgensenip taasisinnaatitaasut kisimik oqaaseqarsinnaatitaanerannik isummani aalajangiusimallugu, Steen Lyngelu taasisinnaatitaasunut ilaanani. Ataatsimeeqataasut ilaat nikuissimapput akerliullutillu aniinnarniarlutik qaatiguutit atissamaalerlugit, taamaalimmallu aqutsisoq aalajangerpoq, peqataasut 30-t missaanniittut unillatsiassasut, pisoq oqaluuseriniarlugu siulersuisut ataatsimiipallalaarsinnaaqqullugit.
– Ataatsimeersuarnermi najuuttut tamarmik oqaaseqarnissamut periarfissinneqartarnerat nalinginnaajuannarsimavoq, oqaaseqarsinnaatitaanngitsut ilaat, Emilie Olsen, Sisimiuneersoq, oqarpoq.
Steen Lynge qaatiguulerpoq anillunilu.
Tamannali sioqqutitsiarlugu matuminnga allattoq nassuiaappaa parteeqatiminit arlalinnit kissaatigineqaraluartoq siulittaasunngorniunnissamut sassarnissani siunertarinngikkini.
- Naagga, tamanna pilersaarutiginngilara. Ataatsimiinnermut erniinnannguaq uteqqissaqqaarpunga aallilaaginnassaanga, aniartuutigaluni oqarpoq.
Kisianni ataatsimeersuartunut uteqqinngisaannarpoq ullullu sinnerani takkuteqqinnani.
Sermitsiami kingullermi saqqummertumi ataatsimeersuarnermit Siverth K. Heilmannip siulittaasunngorfigisaanit allaaserisat atuarneqarsinnaapput.