Aleqap atornerluinera
Atorfilittat imminnut salipput
Namminersorlutik Oqartussani atorfikkaat pingasut immikkut nassuiaateqarnermikkut oqaluttuaraat qanoq ilillutik Aleqa Hammond akiitsuinik akiliisinniarsimagaluarnerlugu
Naalakkersuisut siulittaasuata naalakkersuisoqarfiani pisortaq Svend Hardenberg aamma pisortaq Mininnguaq Kleist kiisalu aningaasaqarnermut sulisoqarnermullu aqutsisoqarfimmi pisortaq Lars Dencker nassuiaasiorsimapput Naalakkersuisunut siulittaasuusimasup Aleqa Hammondip bilagii pillugit suliap qanoq ingerlasimanera oqaluttuaralugu.
Atorfilittat nassuiaaneri Naalakkersuisut pisortatigoortumik nittartagaannut marlunngornermi saqqummiunneqarput.
Atorfilittat taakkua tamarmik pingasuullutik nassuiarpaat Aleqa Hammondip nunatta karsianut akiitsoqalerneranut suliassaq qanoq ingerlassimanerlugu.
Taakkua qaffasissumik atorfilittat pingasut ataatsimeeqatigiittarneri januaarimi 2014-imi aallartipput, tassani aningaasaqarnermut sulisoqarnermullu aqutsisoqarfimmi pisortap, Lars Denckerip, Naalakkersuisut siulittaasuata naalakkersuisoqarfiani pisortaq Svend Hardenberg Aleqa Hammondip nunatta karsianut akiitsoqarnera pillugu ataatsimeeqatigaa.
- Januaarimi 2014-imi DcR-imit (Namminersorlutik Oqartussat naatsorsuuseriviat, aaqq.) akiligassiissutip aamma allakkat nukingisaarutit toqqaannartumik Aleqa Hammondip angerlarsimaffimmini najugaanut nassiunneqarsimasut assilineri tiguakka. Taakkua Svend Hardenbergimut tunniunneqarput, taannalu neriorsuivoq aningaasartai akilerneqarniassammata Aleqa Hammondimut qaqissallugit. Tamatuma saniatigut Aleqa Hammondip Eurocardimi atuineranut atatillugu allagartanut amigaatigineqartunut tunngasut nukingisaarutinik Naalakkersuisut siulittaasuata naalakkersuisoqarfianut nassiussisoqarpoq.
Taama ilaatigut oqaluttuarpoq aningaasaqarnermut sulisoqarnermullu aqutsisoqarfimmi pisortaq Lars Dencker, Naalakkersuisunut siulittaasuusimasup Aleqa Hammondip bilagii pillugit suliap qanoq ingerlasimanera oqaluttuarigamiuk.
Lars Dencker ilanngullugu allappoq:
- Januaarimi 2014-imiit septembarimut piffissap ingerlanerani arlaleriarlunga eqqumaffigeqquara nammineq inuttut atuinermut tunngasunik aningaasanik akilerneqanngitsunik peqarnera akuersaarneqarsinnaanngitsoq.
Tamatuma kingorna Aleqa Hammondip atorfilittarisimasai qaninnerit, Naalakkersuisut siulittaasuata naalakkersuisoqarfiani pisortaq Svend Hardenberg aamma pisortaq Mininnguaq Kleist oqaluttuarput qanoq ilillutik Aleqa Hammondip nunatta karsianut akiligassaanik akiliisinniartarsimagaluarneritsik.
- Siullermik Svend Hardenbergip Aleqa Hammond allagartat ilanngussat aammalu akilinngitsuukkat pillugit marlussoriarluni oqaloqatigaa. Aleqa Hammondillu oqarnera malillugu isumaqarpoq allagartat ilanngussukkat kukkuneqartut, taamaattumik akiliiniarani. Tamatuma kingorna Svend Hardenbergip kukkunerit pillugit Lars Dencker oqaloqatigaa, taannalu akivoq kukkunerit iluarsineqareersut aammalu aningaasartat eqqortuusut. Tamatuma kingorna Svend Hardenbergip aammaloorluni Aleqa Hammond oqaloqatigaa, taannalu akissuteqartoqaraluartoq nikerianngilaq.
Taama Naalakkersuisut siulittaasuata naalakkersuisoqarfiani pisortaq, Mininnguaq Kleist oqaluttuarpoq nassuiaateqarnermini.
Atorfilittat nassuiaatit immikkut ittumik saqqummiutaat pdf-nngorlugit quppernerup talerpiata tungaatigut aallugit atuarsinnaavatit