Atornerluineq millionilikkaanik Nunatsinnut akeqartarpoq

Peqqissutsimut Naalakkersuisoqarfiup nutaamik misissuinerata takutippaa atornerluinermut aningaasartuutit toqqaannartut katillutik ukiu­mut 267 aamma 333 millionit koruunit akornanniittut, tamanna Kalaallit Nunaanni nioqqutissia­nik sullissinernillu pilersuinerit tamarmik nalingisa 1,93 procentiisa aamma 2,42 procentiisa akornanniippoq.

Atuaruk: Imarsiornermik Ilinniarfiup ikiaroornartoq sakkortuumik iliuuseqarfigaa

Ingerlatitseqqinneq
- Ilaqutariinnik ilungersorluni siusinaartumik suliniuteqarnikkut meeqqat pimoorullugu sullinneqarnissaat aammalu inooriaatsip nuanninngitsup kingornuttakkap kipitinne­qarnis­saa pingaaruteqartoq misissuinerup naqissuserpaa. Ilaqutariit ataasiakkaat pisariaqar­titaat aallaavigalugit atornerluinermut katsorsarneqarnissaq pillugu nukittuumik ataqati­giittumillu neqerooruteqartalernissaq pisariaqartinneqartoq misissuinerup aamma upper­narsisippaa. Neqeroorutip taama ittup piviusunngortinnissaa sulissutigerusuppara, peqqissutsimut naalakkersuisoq Doris Jakobsen oqarpoq.

Taamaallaat toqqaannartumik aningaasartuutit
Atornerluinermut aningaasartuutit naatsorsorneqarput peqqissutsikkut isumaginninnik­kullu aningaasartuutit aamma aningaasarsiassaraluanit annaasat aamma pinerluttulior­neq tunngavigalugit.

Ilinniakkamik naammassinnissimannginnermi atornerluinermut allallu toqqaannanngikkaluartumik aningaasartuutit malitsigisaannik sunnerneqarsi­malluni alliartorneq pissutigalugu aningaasartuutit tamakkiisut naatsorsuinermi ilanngunneqanngillat.

Inunnik isumaginnittoqarfik annertunerpaasoq
Isumaginninnermi aningaasartuutit amerlanerpaapput ukiumut 70 aamma 83 millionit koruunit akornanniittut ilaatigut meeqqanik inissiinernut atorneqartarmata aammalu tunisassiornermi annaasat atornerluinermut attuumassuteqartunut 102 aamma 153 millionit koruunit akornanniittutut isikkoqarmata.

Atornerluineq aamma peqqinnissaqarfimmut, politiinut aammalu eqqartuussiveqarnermut akisuvoq. Ilinniartitaanerup inuiaqatigiinnut kingunerisai tassaapput ilinniakkaminnik naammassinninngitsoortartorpassuit inuiaqatigiit aningaasaqarnerannut sunniutilerujussuusoq.

Atuaruk: Meeqqat allaat 11-iinnarnik ukiullit hashitortarput