Attaveqartarnermut ataatsimiititaliamut tunngavissaq inissinneqartoq

Naalagaaffeqatigiinni nunat pingasut siuttuisa juunip qaammataani isumaqatigiissutigaat, attaveqaqatigiittarnermut ataatsimiititaliaq, nunanut allanut, illersornissamut sillimaniarnermullu politikkimi sulianik suliaqartartussat pilersinneqassasoq.

Attaveqaqatigiittarnermut ataatsimiititaliamut suliakkiissut, ataatsimiititaliap ullumi inissititerluni ataatsimeeqatigiinnerani atsiorneqarpoq. Suliakkiissummi ataatsimiititaliami kikkut ilaasortaassanersut kiisalu ataatsimiititaliap sulinerani atugassarititaasut aalajangersarneqarsimapput.

- Danmarkimi naalakkersuisut, Savalimmiuni naalakkersuisut Kalaallillu Nunaanni naalakkersuisut ataatsimoorlutik anguniagarisimavaat, nunanut allanut, sillimaniarnermut illersornissamullu politikkit pineqartillugit, pingaartumik Savalimmiunut Kalaallillu Nunaannut attuumassuteqartut pineqartillugit qanimut, ataqqeqatigiilluni naligiimmillu suleqatigiinnissaq, suliakkiissummi allassimavoq.

Kalaallit Nunaannit Savalimmiunillu nunanut allanut, illersornissamut sillimanianermullu politikkimi suliaqartoqartillugu, pisortatigoortumik danskit akisussaaffigisaanni, inissaqartinneqarnerunermik kissaateqartoqarsimaneratigut ataatsimiititaliortoqassasoq siunnersuutigineqarsimavoq.

Ataatsimiititaliami ilaasortanngorput:

• Danmarkimiit: Ministeriuneq, Nunanut allanut Ministeri, Inatsisinik Atuutsitsinermut Ministeri Illersornissamullu Ministeri
• Savalimmiuniit: Lagmandi, Nunanut allanut Naalakkersuisoq aamma Aningaasaqarnermut Naalakkersuisoq
• Kalaallit Nunaanniit: Naalakkersuisut Siulittaasuat, Inuussutissarsiornermut Niuernermullu Naalakkersuisoq aamma Ineqarnermut, Attaveqaasersuinermut, Aatsitassanut, Inatsisinik Atuutsitsinermut Naligiissitaanermullu Naalakkersuisoq

Naalakkersuisut Siulittaasuata Múte B. Egedep ataatsimiititaliamik pilersitsineq imatut oqaaseqarfigaa:

- Ataatsimiititaliamik pilersitsinikkut takutinneqarpoq nunatta akornanni akimut suleqatigiinnissamut patajaallisaanissamik ataatsimut soqutigisaqarnerput. Minnerunngitsumik nunatta namminneq soqutigisaannut ataatsimullu soqutigisaannut assigiinngiiaartut suliarinissaannut tunngatillugu.

- Taamaaliornikkuttaaq Kalaallit Nunaata nunarsuarmiooqataaleraluttuinnartumi nunanut tamalaanut attaviinut nammineq iliuuseqarnerulluni peqataanissaanut patajaallisaataassaaq "nammineq inissaqarnerulluni", tamannalu neriuuteqarfigilluinnarpara, Múte B. Egede tusagassiorfinnut nalunaaruteqarnermi oqarpoq.

Ataatsimiitialiap suliassai:

Attaveqartarnermut Ataatsimiititaliap, matumani nunanut allanut, sillimaniarnikkut illersornissakkullu politiki naalagaaffimmi oqartussanit ataatsimut isumagisaalluni, naalagaaffeqatigiinnermi piginnaatitsinerit agguataarneranni atuuttut malillugit sulissaaq, ilaatigut

• siamasissumik ataqatigiissumillu paasissutissanik avitseqatigiissinnaaneq periarfissaalissaaq, apeqqutillu nunanut allanut, sillimaniarnermut illersornissamullu tunngasut immikkut Savalimmiunut Nunatsinnullu soqutiginaatillit pillugit ataqatigiissaarinerit naaperiaanerillu periarfissinneqassapput,
• nunat pingasuusut soqutigisaannik tamanik ataatsimut paasinnittoqarnissaa soqutiginnittoqarnissaalu siunertaralugit paasinninnissaq naaperiaasinnaanerlu tunngavissinneqassapput,
• suliat suliassaqarfinni Savalimmiunit/Kalaallit Nunaannit tiguneqartut akornanni pilersimasut aamma nunanut allanut sillimaniarnikkullu kiisalu illersornissakkut politikimut tunngasut oqallisigineqartassapput,
• nunanut allanut, sillimaniarnikkut illersornissakkullu politikip ineriartorfiuneranut pingaaruteqassusaanullu isummersorsinnaassallutik, soorlu teknologiip tungaatigut ineriartorneq eqqarsaatigalugu.

Ministeriuneq: Suleqatigiinneq annertusarneqassaaq

Ministeriunerup Mette Frederiksenip oqaatigaa, Danmarkip, Savalimmiut Kalaallillu Nunaata akornanni suleqatigiinnerup nukittorsarneqarnissaa Danmarkimi naalakkersuisunut pingaaruteqartoq:

- Paasissutissanik avitseqatigiittassaagut, ataqatigiissaarisassaagut qanimullu nunanut allanut sillimaniarnermut sakkutooqarnermullu immikkut Savalimmiunut Kalaallillu Nunaannut immikkut apeqqutit ittut suleqatigiissutigisarlugit.

- Ataatsimiititaliami tassani Savalimmiut Naalakkersuisui Kalaallillu Nunaata Naalakkersuisui ataqqinnittumik naligiissumillu oqaloqatigiittarnissaat annertuumik qilanaaraara, Mette Frederiksen tusagassiorfinnut nalunaaruteqarnermi oqarpoq.