Atuarfiup siulersuisui nutaamik atuarfittaarusupput
Ilulissani Atuarfik Mathias Storchimi atuarfiup siulersuisuisa piumasaraat nutaarluinnartumik atuarfiliortoqassasoq, pilersaarutigineqartutut nutarterinissamut taarsiullugu.
Atuarfiup siulersuisuisa maanna paasisimavaat Atuarfik Mathias Storchip (AMS) qaliaasa iigaasalu annersaat atortunik asbestiusunik sananeqarsimasoq. Siulersuisut siusinnerusukkut paasitinneqarsimapput qaliai kisimik asbestimik sananeqaateqartut, atuarfiulli titartarneqarnerata pisoqqap takutippaa iikkat aamma asbestimik akoqartut.
- Siulersuisut akisussaaffigeqataaffigerusunngilaat atuartut ilinniartitsisullu asbestip pujoralaanik ulorianartunik atugassaqartinneqarnissaat, atuarfiup pilersaarutigineqartutut nutarterneqarnissaani, AMS-imi atuarfimmi siulersuisut siulittaasuat Else Løvstrøm Ilulissat Kommuneannut amma Namminersornerullutik Oqartussanut allappoq.
Atuarfiup siulersuisuisa siunnersuutigaat atuarfimmik nutaarluinnarmik sanasoqassasoq, pilersaarutigineqartutut atuarfiup immikkoortukkaarlugu nutarterneqarnissaanut taarsiullugu. Nutarterinissaq aappaagu aallartissaaq.