Aalisarneq
Avaleraasartuunut akitsuut apparneqassaaq
Naalakkersuisut upernaakkut ataatsimiinnerminni avaleraasartuunut akitsuutip apparneqarnissaanut siunnersuut saqqummiutissavaat
Angallatinut Nunatsinneersunut avaleraasartuunut akitsuut kiilumut 0,95 koruunimiit 0,40 koruuninut akikillineqassaaq. Taama siunnersuuteqarpoq, Akileraartarnermut Aningaasaqarnermullu Naalakkersuisoq, Aqqaluaq B. Egede (IA).
Aammalu angallatit Nunatta avataani nalunaarsorneqarsimasunut akitsuut kiilumut 1,5 koruunimiit 1,00 koruunimut akikillineqassalluni.
Akitsuutit pisakinnerulersitsisut
2015-imi 2016-imilu avaleraarsartuunik malunnaatilimmik pisakinnerulersimaneq siunnersuummut patsisaatinneqarpoq.
Avaleraasartuutinut akitsuutip qaffasinnerujussuanut pisakinnerulersimaneq pissutaavoq, aalisakkanillu allanik aalisarneq imminut akilersinnaanerusoq, aalisarnermik ingerlataqartut tikkuarpaat.
Pisakinnerileriartorneq siunissaq ungasinnerusoq eqqarsaatigalugu Nunatsinnut aamma akisunaarneqarsinnaavoq. Pisarineqartarsimasummi aallaavigalugit Nunatsinni pisassiisoqartarpoq.
PIsassiissutit isumaqatiginniniutigineqassapput
Ukioq kingulleq Nunarput avaataasiorluni avaleraasartoorniartarnermi akuerisaavoq. Alloriarnerup tullerissavaa nunat allat avaatsiornermik ingerlataqartut pisassiissutinik isumaqatiginniaqatiginissaat.
- Akitsuutinik appaannissap avaleraasartuunik nunatta imartaani aalisarnissamik soqutiginarnerulersitseqataanissaa, taassumalu saniatigut aamma Kalaallit Nunaata siunissami avaleraasartuunik pisassat ilaannik amerlanerusunik ataavartumik pisassinneqartarnissamik piumasaqarsinnaalernissaanik siunertaqarpoq, siunnersuummi taama allassimasoqarpoq.
Avaleraasartuunut akitsuut 2014-imi atuutsinneqalerpoq, atuutsinneqaleramilu angallatinut tamaginnut kiilumut 0,95 koruuniusimavoq, kingornalu angallatinut nunami allaneersunut qaffanneqarsimalluni.