Avannaani pisortat suliffiini sulisut sapaatip akunneranut marloriarlutik misissortittassasut
Naalakkersuisut kommuninut misissuutinik nassiussuipput. Avannaata Kommunianilu misissuutit qanoq atorneqassanersut pilersaarusiortoqareerpoq. Inunnik toqqaannartumik sullissisut sapaatit akunneranut marloriarlutik misissorneqartassapput.
Misissuutit kommuninut nassiussuunneqarput.
Kommunillu misissuutissai qanoq atorneqassanersut, Avannaata Kommunia pilersaarusioreersimalerpoq. Kommunip suliffeqarfiutaani inunnik toqqaannartumik sullissisut sapaatip akunneranut marloriarlutik misissortittassapput, tuniluunneq piaartumik unitsinneqarsinnaanissaa pillugu.
Kommuni nittartakkamini taama allappoq.
Ukuusinnaapput:
- Paaqqutarisariaqartut angerlarsimafiini sulisut
- Amngerlarsimaffinni ikiortit
- Utoqqaat angerlarsimaffinni ikiortinit sullinneqartut
- Perorsaasut
- Ilinniartitsisut
- Taamaasiortoqarpoq tuniluunnerup annikinnerpaaffimmiitinnissaa anguniarlugu, taamaasilluni sulisut pigiinnarneqarniassammata innuttaasut sullinneqarnissamik kissaataat matussuserniarlugu, kommuni allappoq.
Paaqqutariffinni tuniluunneq pinngitsoortinniarneqassaaq
Avannaata Kommunia allappoq pingaarluinnartuusoq coronavirusip killilersornissaa tuniluutsitsinaveersaarnissarlu paaqqutarinniffinni. Ilulissani utoqqaat illuanni tunillatsissimasut nutaat 16-it arfininngornermi paasineqarput.
Innersuussutigineqarpoq:
- Coronamut misissuutit arlaeriarluni atorsinnaapput. Assersuutigalugu sulisut misissugassanik sapaatip akunneranut marloriarlutik tigusiffigitissinnaapput, taakku suliffeqarpata inuleralutik Covid-19-mik atupiloornissaanut aarlerinaateqartuni, soorlu paaqqutarinniffiusunik najugaqatigiiffinniluunniit
- Coronamut misissuinissamik neqeroortoqarsinnaavoq paaqqutarinniffiusunut pulaartunut
- Tunillatsissimanermi PCR-mik misissuisoqassaaq saniatigut coronamut misissuumik atuisoqarluni tuniluunnerup piaarnerpaamik aqunnissaa qulakkeerniarlugu
Meeqqat atuarfii ilinniarfiilluunniit matuneqassagaluarpata, ammaqqinneqannginnerini atuartut angajulliit ilinniartullu misissorteqqaarnissaannut Avannaata Kommunia piareersimassalluni allappoq.